ශ්‍රී බුද්ධ වර්ෂ 2563 ක් වූ නිකිණි පුර පසළොස්වක පෝය දින රාජ්‍ය වර්ෂ 2019 අගෝස්තු 14 වනදා බදාදා

ධර්ම දේශනාව:

සසර දුකින් එතෙර වීමට සිව්සස් දහම

“මහණෙනි, අනාර්ය වූ, ග්‍රාම්‍ය දහමක් වූ, පෘථග්ජනයන් විසින් සේවනය කරන්නා වූ, ආර්යයන් සතු නොවූ, අවැඩ පිණිස වූ, කාම වස්තූන් කෙරෙහි ඇලීම නම් වූ කාමසුඛල්ලිකානුයෝගය ද, දුක් වූ , ආර්යයන් සතු නොවූ, අවැඩ ඇසුරු කළ, ශරීරය පෙළීමෙහි පුන පුනා යෙදීම නම් වූ අත්ථකිලමථානුයෝගය ද යන මේ අන්ත දෙකම සේවනය නොකළ යුතු ය. මහණෙනි, තථාගතයන් විසින් මේ අන්ත දෙකට නොපැමිණ පැණැස ඇති කරන, නුවණැස ඇති කරන, මැදුම් පිළිවෙත අවබෝධ කරන ලද්දේ එය කෙලෙස් සන්සිඳුවීම පිණිස, වෙසෙස් දැනුම පිණිස, චතුරාර්ය දැනුම පිණිස, නිවන් පිණිස පවතී.” අපගේ සම්මා සම්බුදුරජාණන් වහන්සේ අධිෂ්ඨානයෙන්, වීර්යයෙන්, ඥාන දර්ශනයෙන් තමන් වහන්සේ විසින් ම අවබෝධ කොට ගත් ගැඹුරු ධර්මය, ප්‍රථමයෙන් දේශනා කළ යුත්තේ කවරෙකුට දැයි සිතා, තමන් වහන්සේ ධර්මය සොයා යන ගමනේ දී උපකාරී වූ ආලාරකාලාම පළමුව ද, උද්දකරාමපුත්ත දෙවනුව ද, සිහිපත් වූ නමුත් ඒ වන විට ඔවුන් දෙදෙනාම ජීවතුන් අතර නොමැති බව දැන, සය වසරක දුෂ්කර ක්‍රියා සමයේ දී උපකාරී වූ කොණ්ඩඤ්ඤ, භද්දිය, වප්ප, මහානාම, අස්සජි යන පස්වග තවුසන් බරණැස ඉසිපතනයේ මිගදායේ සිටින බව දැන ඔවුන් සොයා එහි වැඩම කළ සේක.

නිකිණි පුර පසළොස්වක පෝය

නිකිණි පුර පසළොස්වක පෝය අගෝස්තු 14 වනදා බදාදා අපර භාග 03.45 ට ලබයි. 15 වනදා බ්‍රහස්පතින්දා අපර භාග 05.59 දක්වා පෝය පවතී. සිල් සමාදන්වීම අගෝස්තු 14 වනදා බදාදා ය.

මීළඟ පෝය අගෝස්තු 23 වනදා සිකුරාදා ය.