පොසොන් පුන් පොහෝ දා

බුදු හිමි දෙසු දහම් අමා
රසයෙන් සිරිලක නහවා
අනුබුදු හිමි මිහිඳු රදුන්
අනුරපුරේ මිහින්තලා
පව්ව කරා වැඩම කෙරූ
උතුම් පොසොන් පොහොය අදයි

ඇත් පිය සටහනින් යුතු
බුදු හිමි දෙසු දහම් දෙසා
තිස්ස රජු ද රට වැසියන්
තිසරණෙ පිහිටෙව්ව මෙතින්
උතුම් පොසොන් පොහොය අදයි

දුනු හී කඩු අතේ දැරූ
රජුන් පවා මෙල්ල කෙරූ
මෙත් කරුණා මල් පුබුදා
මුළු සිරිලක එකලු කෙරූ
උතුම් පොසොන් පොහොය අදයි

මං මුළා වු සතට මෙතින්
යටිකුරු කළ දේ උඩුකුරු
කර පෙන්වු මිහිඳු සමිඳු
සිහි කර කළගුණ සලකන
උතුම් පොසොන් පොහොය අදයි

මාලබේ
කේ.ඩබ්ලිව්. සිරිසේන