වරද වැටහුණි

සුළු අරගලය දිග්ගැස්සී බොහෝ දුර
ලේ වැගිරුමක් දක්වා ගිය අනාදර
මගෙ මව සමඟ එකකුසහොත් සහෝදර
හිමියනි මේ මගේ මාමා මහෝදර

මව් උරුමයේ මගෙ හිමිකම දෙනුය කියා
ඒ මිණි පළඟ ගැන කෑදර ගතිය තියා
වයසක මගේ මාමා ජය ලබන නියා
මා මහ අකීකරු නපුරෙක් බවට ගියා

සීයාගේ ඇවෑමෙන් එය අයිති වුණ
මාමණ්ඩියට එරෙහිව අව මඟට පැන
නා පරපුරට අවමානය රැගෙන දෙන
මා කළ වරද පෙන්වා දුනි තිලොව මිණ

සිහසුන පරිදි නා රජ පෙළපතට හිමී
ඒ මිණි පළඟ හිමි අය ‘නා නිරිඳු’ නමී
මාමණ්ඩිගෙන් රජකම පැහැරුමට නැමී
මා කළ වරද වටහා දුනි තිලොව හිමී

කිරළගහවෙල
මාර්ටින් ජයවර්ධන