පෝ දාක අසිරිය

මුළු තුන් මසක් වස් වැස පඬුපුල් අසුනේ
ගැලු දම් රසින් දෙවියන් සවනට ඇසුණේ
හෙලු තුටු කඳුළු මව් දෙවි මගඵල සසුනේ
සැලු බුදු කිරණ පෙනුණා බුදුහිමි දසුනේ

සැවතෙහි තිස් යොදුන් පතුරා බුදු සරණ
පැවතුණි සක්වලෙහි බුදු රැස්වල කිරණ
සුව සෙත ලබා සුර නර පැතුමන් පුරන
නුවරම සංකස්ස අද බුදු හිමි අරණ

දෙවි රෝහණ අසිරි දැක පැතු බුදු බව ය
ගෞරව කරයි මෙත් බෝසතු ලැබ ජවය
පව් කළ දනන් නොදිටිය අසිරිය සුවය
සිව් සස් දහම් දෙසුවේ සම්බුදු බව ය

මෙහෙනක් කරන්නට කුමරිය අනුලාව
ගෙන්වනු පිණිස සඟමිත් තෙරණිය ඈව
දම්සෝ රජුන් ලිපියක් කුමරකු පෑව
සසුනේ අසිරි දිනයකි වප් පොහො ආව

කැස්බෑවේ මුණසිංහ නිශ්ශංක
(ඇත්ගාල ශ්‍රී බෝධිරාජාරාමයේ වැඩ විසූ වැටකේදෙණියේ වජිරකිත්ත තිස්ස හිමි ගුණානුස්මරණ පින්කම නිමිත්තෙනි)