ඌරල ශ්‍රී ක්ෂේත්‍රරාම සුමංගල පිරිවෙන් විහාරස්ථානය
පිරිවෙන් විහාරස්ථානය
ශාස්ත්‍රපති
පලල්ලේ සරණජෝති හිමි
 ඌරල ශ්‍රී ක්ෂේත්‍රරාම සුමංගල පිරිවෙන් විහාරස්ථානය පොළොන්නරු යුගයට අයත්
විහාරස්ථානයකි. විහාරස්ථානයේ ආදි කර්තෘන් වහන්සේ වනුයේ වදුරඹ සිද්ධාර්ථ මා හිමියන්
ය. ඌරල සුමංගල සෝභිත හිමියන් ද විහාරාධිපති පදවිය දරා ඇත. උන්වහන්සේගෙන් පසුව
විහාරාධිපති පදවියට පත් ගාලු ගඟබඩපත්තුව ප්‍රධාන අධිකරණ සංඝනායක වැලිවිටියේ ශ්‍රී
සරණතිස්ස නාහිමියන් වහන්සේ මෙම විහාරය සකලාංග පරිපූර්ණ විහාරස්ථානයක් බවට පත්
කරන්නට ක්‍රියා කළහ.
උන්වහන්සේගේ අපවත් වීමෙන් පසු විහාරාධිපති පදවියට පත්වන්නේ ගාල්ල මාතර හම්බන්තොට
තෙදිසාවේ උප ප්‍රධාන අධිකරණ සංඝනායක සද්ධර්ම කීර්ති ශ්‍රී සිද්ධාර්ථ සරණතිස්සාභිධාන
ශාස්ත්‍රවේදී වඳුරඹ අනෝමදස්සි නාහිමියන් වහන්සේ ය. උන්වහන්සේ ශාසනික ආගමික සමාජ
සේවාවන් රැසක් සිදු කළ අතර විහාරාංගයන්ගෙන් සමන්විත දැකුම් කළු විහාරස්ථානයක් බවට ද
පත් කළහ. සරණතිස්ස දහම් පාසල ද ආරම්භ කරමින් ගුණ නැන දෙකින් පිරිපුන් දරු පිරිසක්
සමාජගත කරන්නට ද ගත් මෙහෙය අගය කළ යුතුයි.
1978 දී ආරම්භ කළ ශ්‍රී සුමංගල පිරිවෙන එදා ප්‍රදේශයේ ගිහි පැවිදි සිසු දරුවන්ට
තක්ෂිලාවක් විය. මෙම ඓතිහාසික විහාරස්ථානයේ වර්තමාන ආධිපත්‍ය දරන්නේ ඌරල විද්‍යාලයේ
නියෝජ්‍ය විදුහල්පති ශාස්ත්‍රපති ඌරල චන්දිම හිමියන් ය. උන්වහන්සේ බද්දේගම
ඉදුරුපන්විල විද්‍යානන්ද විද්‍යායතන පිරිවෙනේ ද පරිවේණාචාර්යයන් වහන්සේ නමක් ලෙස ද
ක්‍රියා කළහ. චන්දිම හිමියන්ගේ පැවිදි සහෝදරයන් වහන්සේ වනුයේ කොළඹ රාජකීය
විද්‍යාලයේ ආචාර්ය ශාස්ත්‍රවේදී පොරවගම නාලක හිමි, වදුරඹ රතනසාර හිමියන් ය.
වත්මන් විහාරාධිපති ශාස්ත්‍රපති ඌරල චන්දිම හිමියන් විහාරාධිපති පදවියට පත්ව දස වසර
සම්පූර්ණ වන මේ මොහොතේ ධාතු මන්දිරය ඉදිකිරීම, චෛත්‍ය රාජයාණන් වහන්සේට
චූඩාමාණික්‍ය පැළඳවීම ආදී සකලාංගයන්ගෙන් සමන්විත විහාරස්ථානයක් බවට පත් එම
විහාරාංගයන් විවෘත කිරීමේ පුණ්‍ය මහෝත්සවය පරිත්‍රාණ ධර්ම දේශනය සමඟ මේ මස 22 වැනි
දා ශතාදික මහා සංඝරත්නය විෂයයෙහි දන් පූජා කර අපවත් වී වදාළ නා හිමිවරු ඇතුළු මිය
ගිය දායක කාරකාදීනට පින් දීමට කටයුතු කර තිබුණි.
ඌරල චන්දිම හිමියන් විශාරද බහුශ්‍රැත යතිවරයන් වහන්සේ නමක් ලෙසත්, දක්ෂ
ධර්මාචාර්යයන් වහන්සේ නමක් ලෙසත් ගිහි පැවිදි සැමගේ ගෞරවයට ලක්ව වැඩ සිටින අතර
උන්වහන්සේගේ ජන්ම දිනය ද මේ මස 20 වන දිනට යෙදී තිබුණි. අපේ ඌරල ක්ෂේත්‍රරාම පුරාණ
විහාරාධිපති නියෝජ්‍ය විදුහල්පති ශාස්ත්‍රපති ඌරල චන්දිම ස්වාමීන්ද්‍රයන් වහන්සේගේ
ලෝක ශාසනික සේවාවන් ශක්තිමත්ව බලවත්ව සිදුකරන්නට සියලු ශක්තිය සැලසේවා’යි සෙත්
පතමු.
|
පසළොස්වක
අව
අටවක
අමාවක
පුර
අටවක
