සිදුවීම් ගැන සිතන හැටි වෙනස් කරමු

ආචාර්ය
උඩුවිල උපරතන හිමි

සෑම මිනිසකුම තමන්ගේ ජීවිතය සාර්ථක කර ගැනීමට වෙහෙසෙයි. නමුත් බොහෝ දෙනකුට වැරදෙන්නේ බාහිර ලෝකය දෙස බලන ආකාරය සහ තීරණ ගන්නා ආකාරය පිළිබඳ නිසි වැටහීමක් නොමැති බැවිනි.

බුදුදහමට අනුව, සම්මා දිට්ඨිය හෙවත් නිවැරැදි දැකීම ඇති කර ගැනීමට උපකාරී වන ප්‍රධාන අභ්‍යන්තර සාධකය වන්නේ යෝනිසෝ මනසිකාරයයි.

විසඳුම් සෙවීම

ජීවිතයේ ගැටලු ඇති වූ විට බොහෝ දෙනෙක් කලබලයට පත්වෙති නැතහොත් අන් අයට දොස් පවරති. නමුත් යෝනිසෝ මනසිකාරය පුරුදු කළ පුද්ගලයා එම ප්‍රශ්නයේ මූලය ඍදදඑ ජ්මිැ සෙවීමට පෙළඹේ. ”මෙම ගැටලුව ඇති වීමට හේතුව කුමක්ද?” සහ ”මෙය විසඳීමට මට කළ හැකි දේ කුමක්ද?” යනුවෙන් විමර්ශනය කිරීම නිසා ඔවුන්ට ඕනෑම අභියෝගයකට ඉතා සන්සුන් ව මුහුණ දීමේ හැකියාව ලැබේ.

මානසික පීඩනය සහ ආතතිය

අද ලෝකයේ මිනිසුන් විඳීන බොහෝ දුක් ගැහැටවලට හේතුව සිදුවීම් නොව, එම සිදුවීම් පිළිබඳ අප සිතන ආකාරය යි. අයෝනිසෝ මනසිකාරය (වැරැදි ලෙස සිතීම) නිසා සුළු සිදුවීමක් පවා මනසින් විශාල කර ගනිමින් අපි පීඩා විඳීන්නෙමු. නමුත්, යෝනිසෝ මනසිකාරය මඟින් සෑම දෙයක් ම අනිත්‍ය බවත්, හේතු ප්‍රත්‍යයන් මත සිදුවන බවත්, අවබෝධ කර ගත් විට, ලාභ-අලාභ, යස-අයස හමුවේ මනස නොසැලී පවත්වා ගැනීමට හැකි වේ.

හරි තීරණ

සාර්ථක ජීවිතයකට නිවැරැදි තීරණ ගැනීම ඉතා වැදගත් ය. යෝනිසෝ මනසිකාරය මඟින් පුද්ගලයකුට යම් ක්‍රියාවක ආදීනව (අවාසි) සහ ආනිශංස (වාසි) පිළිබඳව ගැඹුරින් සිතීමට පුහුණුවක් ලැබේ. ආවේගශීලී නොවී, බුද්ධිමත් ව සිතා තීරණ ගැනීම නිසා වැරැදි තීරණ ගැනීමෙන් සිදුවන පසුතැවීම් සහ පාඩු අවම කර ගත හැකි ය.

සුහදබව

සමාජීය ජීවිතය සාර්ථක වීමට නම් අන් අය සමඟ සුහද ව කටයුතු කළ යුතු ය. යෝනිසෝ මනසිකාරය ඇති පුද්ගලයා අනෙකාගේ ක්‍රියාවන් දෙස අනුකම්පාවෙන් සහ අවබෝධයෙන් බලයි. ”ඔහු මෙසේ කීවේ ඇයි? ඔහුගේ පැත්තෙන් ඇති සාධාරණත්වය කුමක්ද?” යනුවෙන් සිතීම නිසා අනවශ්‍ය ගැටුම් ඇති නොවේ. මෙය පවුල් ජීවිතය සහ වෘත්තීය ජීවිතය සාර්ථක කර ගැනීමට මහෝපකාරී වේ.

ආත්ම විශ්වාසය

තමාගේ වැරදි සහ අඩුපාඩු දෙස නුවණින් බලා ඒවා නිවැරැදි කර ගැනීමට යෝනිසෝ මනසිකාරය මඟ පෙන්වයි. තමා තුළ ඇති අකුසල සහ දුර්වලතා හඳුනාගෙන, ඒවා ඉවත් කර කුසලතාවන් වර්ධනය කර ගැනීමට මෙම චින්තන ක්‍රමය උපකාරී වේ. එමඟින් උසස් පෞරුෂයක් හිමි පුද්ගලයකු වීමට මඟ පෑදේ.

යෝනිසෝ මනසිකාරය යනු හුදෙක් ආගමික වතාවතක් නොව, එය උසස් මානසික විද්‍යාවකි. එය වර්ධනය කර ගැනීමෙන් අපට ලෝකය දෙස වඩාත් පැහැදිලි සහ යථාර්ථවාදී දැක්මකින් බැලිය හැකි ය. තම සිත මෙහෙයවන ආකාරය පාලනය කර ගත හැකි පුද්ගලයාට මුළු ලෝකයම ජය ගැනීම අසීරු නොවේ. එබැවින් එදිනෙදා ජීවිතයේ සෑම ක්‍රියාවක දී ම ”ඇයි සහ කෙසේද” යනුවෙන් නුවණින් විමසීමට පුරුදු වීම සාර්ථකත්වයේ රහසයි.