කෙලෙස් මලින් අඳවී

බුදුන් පුතු අරිහතුන් සුවහස්
උපන් හෙළ දෙරණේ
බුදුන් දම් සඟ රුවන් සිරිමත්
පිරිත් සර නැඟුණේ
මරුන් කෙළි මඬලක්ව
දුසිරිත් අන්තයට පිරිහේ

සවන් යුග කුල්මතින් මිහිරිව
ගිලේ රස සයුරේ
ගිමන් නිම වන නිවන් හමුවන
දනන් නැත පෙනුණේ
කෙලෙස් පටලින් වැසුණු මනසට
දහම් ගුණ නොදැනේ

නුවන් ඇස රන් රුවන් පිළිරු
දැකුම් නැත බැඳුණේ
දහම් නොඇසුණු සිතින් කෙදිනද
බුදුන් රුව දකිනේ
කෙලෙස් මලින් සතන් අඳවී
නිවන් මඟ නොපෙනේ

ආචාර්ය
රත්නපාල වික්‍රමසිංහ