අමරපුර පුර හඳ

පුරහඳ සේ දිලෙන නුඹ කුස අමරපුර
නායක පදවියෙන් පුද ලැබ උතුරුතර
ගුණ නැණ සීල රැස් දහරින් එළිය කර
මෙත් හිමි වඩිති සඟ තරු මල් පුබුදු කර

ජන්මය ලද රුහුණෙ කරගොඩ උයන්ගොඩ
පැවිදි ව සබරගමු මිණිපුර බලංගොඩ
රැක ගෙන දහම යෙදෙමින් ලෝ සසුන් වැඩ
මහනා සමිඳු වැඩි මඟ කොපමණ ද හැඩ

බෝ සත් අනඳ මෙත් නා සමිඳු පරපුරේ
මූලස්ථානයෙහි වැජඹෙන රුවන්පුරේ
බෝ පත් සැලී ජයසිරිමහ රුවන්තුරේ
වේ සෙත්! මහා නා සමිඳුට නිරන්තරේ

පුන්කලසක් ය පිරි නැණ - ගුණයෙන් පැසුන
මෙත් ගඟුලක් ය සදහම් සිසිලස ගලන
සිත අරණක් ය නිති සිල් සුවඳින් පිරුණ
රන් වියනක් ය බබළන සම්බුදු සසුන

ඉංගි‍්‍රසි පාලි හෙළ සකු බස් පගුණ කෙරූ
තුන් පිටකය ම අතැඹුල සේ මුවග පිරූ
සරසවි ඇදුරු පිරිවෙන් අදියුරු ව හුරු
මහ නා සමිඳු නමදිමි පිළිවෙතින් සරු

ආර්.ඒ.ඩී. සිරිසේන