ඇසළ පෝදා වරුණ

කාලය දීපය දේශය බැලුවා
මව්තුම සමඟින් කුලයත් බැලුවා
නිසි දහමක් ලොව නැති බව දුටුවා
බෝසත් මනුලොව වඩින්න සිතුවා

මහභාරතයේ නුවර කිඹුල්වත්
කපිලවස්තුපුර මහරජ තෙදවත්
සුද්ධෝදන වූ ශාක්‍ය කුලවත්
බිසවට වූවා මහමායා පුත්

ඇසළ පෝයදාවක මහමායා බිසවුන්
සැතපෙන කල දුටු සිහිනය මෙ ලෙසින්
සුදු නෙළුමක් ගෙන සුදු ඇත් පැටවෙක්
කුසට ඇතුළු වූවා දකුණු ඇලෙන්

සරණපාවාගෙන කුමරිය යශෝධරා
විඳිනා කල රජසැප සිදුහත් කුමරා
දැකලා සතර පෙර නිමිති ද සිත දරා
ඇසළ පෝයදාවක ගියෙ ගිහිගෙය හැරා

සොයා ගන්න යහමග බව දුක නිවන
ගමන යන්න සැරසුණ විට බෝසත් එදින
යශෝධරා දේවිය ලැබුවා පුත් රුවන
තැබුවා නමක් පුතුහට රාහුල ලෙසින

සිදුහත් තවුසාණන් ලැබ සම්බුදු පදවි
සය වසරක් එක්ව සිටි මිතුරන් සිහිවි
ඉසිපතනේ දි පස්වග තවුසන් හමුවී
ඇසළ පෝය දා දෙසුවා දම්සක් මුල්වී

දෙසූ දහම් ඇසුවා පස්වග මහණුන්
කොණ්ඩඤ්ඤය පළමුව වූවා සෝවාන්
ගෞතම මුනිඳුගෙ මංගල දෙසුමෙන්
ඇසළ පෝය දා සැනසුවෙ ලෝ සතුන්

සම්බුදු සසුනේ වස්කාලය එළඹෙන්නේ
දායකයින් වස් ඇරයුම් දෙන්නේ
මහසඟ රුවන වස් සමාදන් වන්නේ
ඇසළ පෝය දා පළමුව වෙන්නේ

ගෞතම බුදුහිමිගෙ වම් දළදාවත් රැගෙන
හේමමාලා සමඟින් කුමරා දන්ත
කිත්සිරිමෙවන් රජ සමයේ ලක් දෙරණ
ඇසළ පෝයදාවක ඇත මෙහි සපැමිණ

ඒ.එම්.අබේසිංහ බණ්ඩා
මාපනාවතුර, මහනුවර