මහ සෑ මුදුනට සඳරැස් වැටිලා

මිස්සක පව්වෙන් පුන්සඳ පායා
පොසොන් පොහෝ දින මිහින්තලේ
මහ සෑ මුදුනට සඳරැස් වැටිලා
හරිම ලස්සනයි මිහින්තලේ

මුව පොව්වන් හට තෝතැන්නක් වූ
සිව්පාවුන් පිරි මිහින්තලේ
මිහිඳු ගුහාවට රහතුන් වැඩලා
බුදුරැස් විහිදෙයි මිහින්තලේ

පටමක ථූපය ළඟ සැදහැත්තෝ
පිරුවට හැඳගෙන මිහින්තලේ
සිල් අරගන්නට බවුන් වඩන්නට
සැරසෙයි නිතර ම මිහින්තලේ

මඟතොට සරසති දන්සැල් කරවති
පොසොන් පොහෝ දින මිහින්තලේ
බැති ගී ගයමින් අනුබුදු සිරිතට
දොහොත් මුදුන් දෙයි මිහින්තලේ

කෝන්වැවේ සිරිසුමන හිමි

තණ්හා ආශා

සිතෙහි සැමදා
සිත උරුම ඔහුට
දුක දෙයි

තණ්හා ආශා
බිය සදා දෙයි
සිත උරුම අයට
දුක දෙයි

තණ්හා ආශා
භව දුක සදා දෙයි
භවයෙහි ගමන් කරවයි
නො නසා නම් තණ්හා
දුක සදා දෙයි මහා

ශාස්ත්‍රවේදී
කෝට්ටපිටියේ පඤ්ඤාසිරි හිමි
දම්සෝපුර

නොමැරෙන ඇත්ත

රුවන් දම්වැලේ
අග මුල නැත
සෙවීමට හැකි
ජගතෙක් ද නැත
අමිල කාලය එයි
පෙර දවස යයි හෙටට
නිමේෂය එක් පුරුකකි
එයයි ගෙවෙනා ජීවිතය
මාරුවී පුරුකෙන් පුරුක
වැසී යයි පස් කඳ
මුසුවී බොල් පසට
එයයි බුදු සසුනේ
නොමැරෙන ඇත්ත

කුලුණූ හේරත්