දිවි තුරා

නොකරමි කිසිම විට කෙනෙකුට අපහාසේ
නොසොයම් මගෙ මිසක් තව කෙනෙකුගෙ දෝසේ
පෙන්වමි කාට වුව මුව රැඳි මදහාසේ
දෙන්නෙමි පිනට පමණක් හිත අවකාසේ

මටත් වඩා නැති බැරි අය ඇත එමට
මේ ටිකවත් ලැබුණෙ මං පෙර කළ පිනට
ලොව සිත නූපදවමින් අන් සතු දෙයට
වඩවා ගන්න වෙහෙසෙමි හිත තුළ සතුට

නොබලමි ඉවත නැති බැරි අයකු දුටු විට
වෙන්නෙමි පිළිසරණ අත මිටේ තරමට
අණ බෙර ගසා මහ පින්කම් නොකෙරුවට
දෙන දේ දකුණතින් දෙමි රහසේ වමට

කනින් අසමි යහපත් දේ පමණක් ම
නෙතින් බලමි මතු වැඩ සැලසෙන දැක් ම
සිතින් ඉවත ලම් පව් සිතුවිල්ලක් ම
උතුම් බුදු මගේ යම් දිවි ඇති තෙක් ම

චන්ද්‍රා වාකිස්ට