සිතේ සොම්නස උපදවන ධර්ම

සම්මා සම්බුදු රජාණන් වහන්සේ පහ දා වදාළ දානමය පින්කමක් සිදුකිරීමේ දී දන් දෙන දානපතිතුමා (දායක පක්ෂය) සීලවන්ත ව සිටීම එම දානය මහත් ඵල වීමට හේතු වන එක් අංගයක්. දන් දෙන දායක පින්වතුන් තම තමාට අයත් නිත්‍ය ශීලයක හෝ, ගිහි පින්වතුන් වශයෙන් නම් පංචශීලයේ හෝ, අධිශීල සංඛ්‍යාත උපෝසථ අටශීලයේ හෝ දස ශීලයේ හෝ පිහිටා ගෙන එම දන් පින්කම් සිදුකරනු ලබනවා නම්, ශීලයේ පිහිටා දෙනු ලබන දානය නොවරදවා ම මහත් ඵල මහත් ආනිශංස ගෙන දෙන පින්කමක් බවට පත් වෙනවා. දානමය පින්කම මහත්ඵල වීමට අවශ්‍ය වන ඊළඟ කරුණ නම්, දානය පිළිගනු ලබන ප්‍රතිග්‍රාහක පක්ෂය ශීලවන්ත වීම. චිත්ත සන්තානය ප්‍රසන්න වීම. කර්ම ඵල විශ්වාස කිරීමේ නුවණින් යුක්ත වීම. මේ කරුණු අතරින් සම්පාදනය කළ යුතු කරුණු තුනයි අපට අවශ්‍ය වන්නේ. ඒ මොනවා ද? දාන වස්තුව ධාර්මිෂ්ඨ කර ගැනීමත්, චිත්ත සන්තානය ප්‍රසන්න කර ගැනීමත්, නිරන්තරයෙන් ම ඤාණ සම්ප්‍රයුක්ත ව එම කුසල ක්‍රියාවල යෙදීමත් යන තුන යි. වස්තුව ධාර්මිෂ්ඨ වීම ගැන අමුතුවෙන් සිතන්න අවශ්‍ය නැහැ. දානපතිතුමා ශීලවන්ත නම්, ධාන වස්තුව පරම ධාර්මිෂ්ඨවයි උපයා සපයා ගනු ලබන්නේ. එබැවින් ධාර්මිෂ්ඨ දාන වස්තුව එයින් ම සම්පූර්ණයි.