පින්බර ඇසළ මාසය

මහාමායා මව්කුස
බෝසතුන් පිළිසිඳගත්
ඒ පින්බර මාසය
ඇසළ නම් විය........

අනිත්‍ය වූ ඒ සියල්ල
හැර දමා බෝසතුන්
නික්මුණු ඒ මාසය
ඇසළ නම් විය......

ලොවක් නිවුණු
ඒ මංගල දම් දෙසුම
පින්බර ඇසළ මාසයේ
දෙසීය.....

කන්ද උඩරට
මහත් හරසර
පෙරහර මංගල්‍යය
පින්බර ඇසළ මස
වීදි පුරා ගමන් කරයි.....

සජිනි පියුමිකා ජයවීර
කු/මලියදේව බාලිකා විද්‍යාලය, කුරුණෑගල

උපමා නොමැත

මුළු ලොව සතුන් වෙත මෙත් සිත පෑ සේක
ඒ සැම වෙතට ධර්මය දන් දුන් සේක
දිළිඳුන් ධනවතුන් මැන නොබැලුව සේක
කුඹුරක බීජ ලෙස දම් වැපිරුව සේක

ගණනය කළ නොහැක සතහට පිහිට වුණා
නව ලොවුතුරා ශ්‍රී සදහම් රසය වුණා
උපමා නොමැත උත්තම ගුණ ගැන වැණුනා
නොමැකෙන ලෙසින් බුදු මහිමය ඇත දිලෙනා

ගිලානෝ වැඩිහිටි නිවහන
සුනීතා සෞමලතා

නපුරු සිතිවිලි නැඟෙන විට දී

හිතකර නොවන සිතිවිලි උපදින කලට
මතු කර ගනිමු කුසලය ප්‍රබලව හිතට
යටකර නපුර යහදෙය මතුකර උඩට
සරිකර රැඳෙමු ලද උස් මනසේ වගට

මතුවෙන සිතිවිල්ලෙ ආදීනව දකිමු
සතුවෙන විපාකයෙ තරම ද ගෙන බලමු
විඳවන කලට දුක දැඩිවෙන හැටි හිතමු
එමගින් නරක දෑ දුරැලීමට යෙදෙමු

සිදුවුන නරක දෙය නිතරම නොවෙමු කතා
එමඟින් අකුසලය පෝෂණ වෙතිය ඉතා
“මතුදින එවැනි දෙය නොකරමි” දැඩිව සිතා
පහදින තීරණය ගමු දිවි සුවය පතා

එනවිට නරක සිතිවිල්ලක් හිත තුළට
“ඇයි මට මෙහෙම වනුයේ” යැයි ගමු මනට
මතුකොට ප්‍රඥාව පෙරදැරි කර හොඳට
ඉවතට ඇදෙමු ඉන් ජය ගත හැක ඔබට

අධ්‍යාපනවේදී විශ්‍රාමලත් පරිවේණාචාර්ය
පී.බී. ගුණරත්න

පින් පිරුණූ පෝ දාක

ඇසළ පෝයදාවක මහමායා බිසවුන්
සැතපෙන කල දුටු සිහිනය මෙලෙසින්
සුදු නෙළුමක් ගෙන සිය සොඬින්
කුසට ඇතුළු වූවා දකුණු ඇලයෙන්

සරණපාවා ගෙන කුමරිය යශෝධරා
විඳිනා කල රජ සැප සිදුහත් කුමරා
දැකලා සතර පෙර නිමිති ද සිත දරා
ඇසළ පෝයදාවක ගියෙ ගිහිගෙය හැරා

සිදුහත් තවුසාණන් ලැබ සම්බුදු පදවි
සය වසරක් එක්ව සිටි මිතුරන් සිහිවී
ඉසිපතනේ දී පස්වග තවුසන් හමුවී
ඇසළ පෝය දා දෙසුවා දම්සක් මුල්වී

දෙසූ දහම් ඇසුවා පස්වග මහණුන්
කොණ්ඩඤ්ඤය පළමුව වූවා සෝවාන්
ගෞතම මුනිඳුගෙ මංගල දම් දෙසුමෙන්
ඇසළ පෝය දා සැනසුවේ ලෝ සතුන්

සම්බුදු සසුනේ වස්කාලය එළඹෙන්නේ
දායකයින් වස් ඇරයුම් දෙන්නේ
මහ සඟ රුවන සමාදන් වන්නේ
ඇසළ පෝය දා පළමුව වෙන්නේ

ඒ.එම්. අබේසිංහ බණ්ඩා
මාපනාවතුර - මහනුවර

රූපය වෙනස්

කැඩපත නැහැ වෙනස් වුණේ
රූපය දකිමි කැඩපත දෙස හිඳිමි බලා
“මම” යැයි සිතමි එය ඉන්නේ ම දෙස බලා
දුටුවත් එය එසේ සැමදා දිවිය පුරා

බැහැ එය දකින්නට නැවතත් සසර පුරා
ළමයකු ලෙස දුටුව රූපය මනසෙ ඇඳේ
තරුණකු ලෙසින් දුටු රූපය සිතේ බැඳේ
වියපත් වී පෙනෙන රූපය නිතර පෙනේ
රූපය වෙනස් කැඩපත නැහැ වෙනස් වුණේ

සුදත් විජේසුන්දර
අමෙරිකා එක්සත් ජනපදය

අපේ නා සමිඳු

මෙත් සිතිවිලිවලින් ගුණ දම් පුරා ගෙන
සැම සතහටම කරුණාබර දයා වෙන
ධර්මය නිතර හදවත තුළ රුවා ගෙන
සසුනේ පැවිදි උතුමෙක් රටට ම වටින

බණ භාවනාවල යෙදෙමින් නිතර
වත් පිළිවෙත් කළේ දහමට ළැදිව නිතර
ධර්මය පිණිස රට රටවල වඩිනා අතර
පිනදම් කළේ යන්නට සසරින් එතර

නැති බැරි අය සොයා පිළිසරණක් වෙමිනේ
නිවසක් නැති අයට නිවහන සාදා දෙමිනේ
අහරක් නැති කුසට අහරක් ලැබ දෙමිනේ
කුසගිනි නිව්වේ වෙසතුරු නිරිඳුන් ලෙසිනේ

සැමට සිරිසෙත ලබා දීමෙන් සසුන එකලු කළේ සමිඳු
ලොවට වැඩ ඇති උතුම් බෝසත් ගුණැති පින්බර වූ සමිඳු
පැතුම් බලයෙන් සසර දිනුමට පින් ලබන උතුමෙක් සමිදු
නිවන ලැබුමට පැතුම වේවා කහට රුප්පේ වජිර සමිඳු

ශීලා ජයකොඩි
තඹුත්තේගම