වලේබොඩ ගුණසිරි අනුනාහිමිපාණෝ

මිණිපුර සබරගමු හෙළ රන්බිම පසිඳු
සුරපුර සිට අවුත් ඉපැදුණු නා සමිඳු
සිරිසර සසුනඹර පෑ තරිඉඳු දිනිඳු
විල්තෙර සියපතෙකි සුසුවඳ පිරි පුබුදු

පෙරුමන් පුරා විත් මඟ කල් කප් සුවහස්
තරු මැද සසුනඹර බැබළුණු ලොව නිදහස්
ගරු බුහුමන් ලැබූ සඟ දිවියට පියදස්
තුරු වැල් පවා නමදිති ගුණයට අනුසස්

අනු නා සමිඳු බද්දේගම පසිඳු වියත්
දීනු මඟ පබාමත් කළ ඇදුරිදුයැ මහත්
අනුහස් වඩාහිඳ සඟ නිලඹරෙහි දියත්
මනු සත් ලොවේ ඉරබටු තරුවකිය උගත්

මහ පිරිවෙනේ සිරිලක් විදුහලේ ගරු
සහයෝගයෙන් ගුරුසිසු හා සමග පිරු
කහ වත් සේ ම ගිහි සිත් දිලු සදිසි හිරු
මහ තෙරනමකි මැණිකක් බඳු අඳුර දුරු

මිරිදිය ගඟක් සේ සිත් දම් දියෙහි රැඳු
අරි අට මඟෙහි වැඩි යතිවරයෙකි ය බුදු
පිරි හද මඬල කරුණාවෙහි සිසිල බෙදු
සිරි පද වඳිමු අනුනාහිමි පදවි ලදු

ගුණ පිරි ඇදුරු ගම් පියසෙහි වලේබොඩ
තරුපිරි නිලඹරෙහි සඳු සේ ලැබූ ඉඩ
රසපිරි බුදු වදන් දෙසු මුදු සරේ හඬ
මුවපිරි, ඇසූ දන අහුරති ගමේ ඉඩ

අභිමන් මහ නිකායික රාමඤ්ඤ ගරු
වඩිමින් නේක තනතුරු ආ මඟෙහි දැරු
බුහුමන් ලබලබා පෙරුමන් බලෙන් පිරු
දැනුමින් අහස මෙනි විශ්වය තිබෙන තුරු

වන පස මලින් පිරි පුදසුන් දකින්නට
තැන තැන අසපු පිරිවෙන් සැදු දනන්හට
පිනට ම උරුම අනුනාහිමි වහන්සේට
දණ බිම නමා අවසර පා වඳීන්නට

කලාභූෂන, ධර්ම සාහිත්‍යවේදී
සාසනකීර්තී දේශාභිමානී
ඩබ්ලිව්. කේ . සරත් විමලසිරි