ශ්‍රී බුද්ධ වර්ෂ 2564ක් වූ අධි වප් අව අටවක පෝදා, රාජ්‍ය වර්ෂ 2020 ඔක්තෝබර් 09 සිකුරාදා

සදහම් අරණ

සතුන්ට හිංසා නොකරමු

අප සියල්ලෝ ම මනුෂ්‍යයෝ වෙමු. අපි මේ ලොවේ මිනිසුන් ලෙස ජීවත් වුණ ද, සදාකාලික ව ජීවත් වන්නෝ නොවෙමු. තාවකාලික ජීවිත ගත කරන්නෙමු . සතුන් ද එසේම ය. අප මෙන්ම සතුන් ද එම සංසාර චක්‍රයේ ඇවිද යන්නෝ ය. අපට මෙන්ම සතුනට ද මේ ලොවෙහි ජීවත්වීමට අයිතියක් ඇත. අප හිංසාවට අකැමැති ය. පීඩාවට අකමැති ය. ඒවගේ ම අපට බිය දැනේ. වේදනාව දැනේ. මෙලෙස ම සතුනට ද හැඟීම් දැනීම් ඇත. ඔවුන් ද හිංසාවට අකැමැති ය. පීඩාවට අකමැති ය. බිය ද. වේදනාව ද ඔවුනට දැනේ. අප, අපට හිංසා කරනවාට අකැමැති යි වගේ ම සතුන් ද එයට අකැමැති ය. එනිසා සතුනට ඔබ පුංචි හෝ හිංසාවක් නොකරන්න. ඔවුනට අනුකම්පා කරන්න. ආදරය කරන්න. එය මෙලොවටත්, ඊළඟ ආත්මභාවවලටත් හේතු වන පිනකි.

බී.ඒ. දිනෙත් සීනාල් නෙත්සර
12 ශ්‍රේණිය
ඩී.එස්. සේනානායක මධ්‍ය මහා විද්‍යාලය මීරිගම

දැය පුබුදුවාලූ හඬ

“සිංහලයිනි නැගිටිව් බුද්ධගයාව බේරා ගනිව්.!” මේ සිංහ නාදය ඇසෙන විට අපට සිහිපත් වන්නේ සිංහලයන් අවදි කරන්නට ඇප කැප වූ අනගාරික ධර්මපාලතුමායි. කුඩා කල සිට ම රට, දැය, සමය පිළිබඳ තිබූ ඒ දේශප්‍රේමීත්වය නිසා ම ඉංගී‍්‍රසීන් හට එරෙහිව මුහුණට මුහුණ සටන් නොකළත් අධිරාජ්‍ය විරෝධී මහා ජනමතයක් ගොඩනැඟීමට එතුමා සමත් විය. ජාතිය ආගම පුබුදු කිරීමට පුරෝගාමී මෙහෙවරක්, කළ අනගාරික ධර්මපාලතුමා ‘සිරිදේවමිත්ත ධම්මපාල’ නමින් පැවිදි විය. රට දැය සමය පුබුදා සිංහලයන් අවදි කළ මේ මහා වීරවරයාණෝ දැය ම හඬවා දැයෙන් සමුගත්තේ ලක් මවගේ උතුම් පුතකු සේ තම උදාර සේවාව නොපිරිහෙළා තම උපන් බිම වෙනුවෙන් ඉටු කරමිනි.

එල්. නෙහාරා සෙව්වන්දි පෙරේරා
07 වන ශ්‍රේණිය
සුවිශුද්ධාරාම දහම් පාසල - වැල්ලවත්ත

කඩුපුල් මල්

නිසල රැයේ විකසිත වන
කඩුපුල් මල් කුමාරියේ
රැයෙහි ඇවිත් රැයෙහිම යන
ලස්සන වන මනාලියේ

සඳට වඩා සිසිලයි මට
ලොවම නිදන රාත්‍රියේ
නොනිදා අද පිපී දිලෙනු
කඩුපුල් මල් කුමාරියේ

අශානි උමේෂා සෙත්මිණි
10 ශ්‍රේණිය
ශ්‍රී සීලානන්ද දහම්පාසල - ඇල්ලලමුල්ල

සතුන්ට ආදරය කරමු

සතුන්ට ද අපට වාගේ පණ තිබේ. අපට යමෙක් හිංසා කළොත් වේදනාවක් ඇතිවේ. කෝටුවකින් හෝ පොල්ලකින් අපේ ශරීරයට ගැසුවොත් තුවාල ඇති වේ. එයින් අපට ඇතිවන අමාරුවට වෛද්‍යවරයකුගෙන් බෙහෙත් ගැනීමට හැකි ය. එහෙත් සතුන් එසේ නොවේ. අසරණය. ඒ නිසා අප කිසි විටෙක සතුන්ට හිංසා නො කළ යුතුයි. සතුන්ට හිංසා කිරීම පාපයකි. අප හැමවිට ම සතුන්ට කරුණාව දැක්විය යුතු ය.

ජෙනුලි දහම්සා
3 වසර
සිරි මහානාම දහම් පාසල - පැල්වාඩිය
කැඩන්දොල

අපේ පන්සල

අපේ පන්සල අඹගහලන්ද ශ්‍රී විවේකාරාමය යි. විහාරාධිපති ස්වාමින් වහන්සේ ඇතුළු ස්වාමීන් වහන්සේලා සය නමක් මෙහි වැඩ වාසය කරති. අප විහාරස්ථානය අංග සම්පූර්ණ දර්ශනීය පන්සලක් බව මට සිතෙයි. එහි ශ්‍රී ගුණවංශ දහම් පාසල ද පවත්වයි. මා අපේ පන්සලට හරිම ආදරෙයි.

ගගනි පහන්යා ජයතිලක
2 ශ්‍රේණිය
හොරගස්මුල්ල ප්‍රාථමික විද්‍යාලය -මිනුවන්ගොඩ

ථූපාරාමය

ශ්‍රී ලංකාවේ ප්‍රථම බෞද්ධ පාලකයා වූ දේවානම්පියතිස්ස රජු විසින් මෙම ථූපය ඉදිකරවන ලදී. බුදුන් වහන්සේගේ දකුණු අකු ධාතුන් වහන්සේ නිදන් කොට මෙම ථූපය සාදවා ඇත. අනුරාධපුරයේ ප්‍රථමයෙන් ම ඉදි කළ ස්ථූපය නිසා මෙය පඨමක චේතිය යන නමින් ද හැඳින් වේ. එකල මෙම භූමිය කකුසඳ, කෝණාගම, කාශ්‍යප, ගෞතම යන සතර බුදුවරුන්ගේ පාද ස්පර්ශයෙන් අති පාරිශුද්ධියට ලක් වූ ස්ථානයක් බව හැඳින් වේ. බුදුන් වහන්සේ තෙවන වර ශ්‍රී ලංකාවට වැඩම කරවූ අවස්ථාවේ සුළු වේලාවක් සමාධිසුවයෙන් වැඩ හිඳිමින් පාරිශුද්ධියට හා පූජනීයත්වයට පත් මෙම භූමියෙන් ස්ථූපය තැනීමට මිහිඳු මහරහතන් වහන්සේගේ උපදෙස් පරිදි සිදුව ඇත.

චමෝදි තත්සරණි සුරසිංහ
8 ශ්‍රේණිය
මලියදේව ආදර්ශ මහා විද්‍යාලය, කුරුණෑගල

පැන විසඳුම්

පහත සදහම් ප්‍රශ්නයට පිළිතුර පැහැදිලි ව ලියා අප වෙත එවන්න.

වැඩිහිටියන්ට ගරු කරමු යන මතෘකාව යටතේ කෙටි රචනාවක් නිර්මාණාත්මක ව ලියා අපවෙත එවන්න.

ජයග්‍රාහී දරුවෙකුට දයාවංශ ජයකොඩි සහ සමාගමෙන් දහම් පඬුරක් පිරිනැමේ.

මව්පියන්ට සලකමු	පරිසරය රැකගනිමු

මරදන්කඩවල සුධම්ම හිමි 1 වන වසර විද්‍යාවාස පිරිවෙන මිරිගම	සනුජි මිහිරන්දි 4 වන ශ්‍රේණිය ශ්‍රී සෝමානන්ද දහම්පාසල හැඟව