|
මහා කස්සප වෙහෙර
දකුණු ලකේ බෙන්තර පුරයේ තිබෙන
කස්සප හිමි රහත් ධාතුන් වැඩ හිඳින
තුන් ලෝකයේ එක ස්ථානයක් වන
මහා වෙහෙර අපි නමඳිමු බැති සිතින
යක්කලමුල්ලේ සරණ හිමි
බෙන්තොට
****
ඇයි?
 මල් පිපුණේ
ඇයි?
පරවෙන්න නේද?
ඔබ මා ඉපදුණේ
ඇයි?
මිය යන්න නේද?
මේ ටික
නොතේරෙන්නේ
ඇයි?
අවිද්‍යාව නේද?
ලයනල් දසනායක
පන්නිපිටිය
****
පැතුම
කොරෝනා නිසා සිදුවන දේ ලොවට
අති දුක්බර යි ඉවසනු බැහැ කිසිම විට
ලක්ෂ ගණන් ජීවිත මහ පොළොව යට
වැළලෙන සැටි දකින විට බුදු බණ එයි සිතට
ලෝකෙට රෝග දුක එක ලෙස පවතිද්දී
තව ලොකු දුකක් ඇත වයසට පත් වෙද්දී
දඹදිව් තලය සුවපත් වී පෙර පරිදි
කවදා වේද? පැනයකි නෙත් තෙත් වෙද්දී
කරුණා අමරකෝන්
වැලිගල්ල
****
අසිරියකි
අසිරිමත් දෙයකි මිනිසත් බව ලැබුම
ලෝ සතුනට සැපකි බුදුවරු බිහි වීම
වේ මය දුලබ හිමි දෙසු අම දම් ඇසුම
එලෙසම අසිරියකි කළ ගුණ සැලකීම
අශෝකා අබේවර්ධන
කැටඹුලාව
****
සිතක
මහිම
 බුදු මඟට පිළිපන්නෝ
සිත දමනය කරගන්නෝ
සමත විදසුන් වඩන්නෝ
නිවන් සැප ලබන්නෝ
මීගම්මන සුධම්මදින්නා
මෙහෙණින් වහන්සේ
වත්තේගම
****
උවදුරක උපදෙස
නොසිතු ලෙස සපැමිණි
රෝබියෙන් රට ඇලලුනි
කර්මයක පල වැනි
විපත වයිරසයක් ව වැළඳුනි
පස් පව් නොකර මින්
පිළිවෙත් හොඳට රකිමින්
සිටින විට දැහැමින්
නොවේ උවදුරු කිසිත් සැබවින්
මිරිජ්ජවිල සිරි දන්තනාරායන
****
මෙවර ජයග්‍රාහී කවිය
සිතන්න
හැකි ද ඔබ හට සතුටු වන්නට අනුන්ගේ සැපතෙදි වහා
හැකිද ඔබ හට බෙදා ගන්නට අනුන්ගේ දුක සැප වහා
ඔබට හැකි නම්, මුදා ගන්නට අනුන් විපතින් වහ වහා
සතුටු වන්නට ඔබට හැකි වෙයි නිවන එයි ඔබ වෙත වහා
සුදත් විජේසුන්දර
ඇමරිකා එක්සත් ජනපදය
****
කවි කිවිඳියනට සතර පෝ දාට ම
දහම් තුටු පඬුරු
බුදුසරණ ‘පහන් සිතක කවි’ නිර්මාණ පිටුව සරසන ලේඛකයන් ඇගයීම පිණිස දෙහිවල නැදිමාල
බෞද්ධ සංස්කෘතික මධ්‍යස්ථානය සහ කොළඹ සම්බුද්ධත්ව ජයන්ති මන්දිරයේ අධ්‍යක්ෂ කිරම
විමලජෝති නා හිමියන්ගේ අනුග්‍රහයෙන් දහම් පඬුරු තිළිණ කෙරේ. සතර පෝදාට ම හොඳම
නිර්මාණ එවන ජයග්‍රාහකයන් සතර දෙනෙකුට එම තිළිණ පිරිනැමෙනු ඇත.
සංස්කරණය
ජම්මික ප්‍රබෝධනී වැලිකල |
අව
අටවක
අමාවක
පුර
අටවක
පසෙලාස්වක
