|
තෙරුවන් වන්දනාව
ගෞතම සුගත මා හිමි සඳු තථාගත
නිවී සව් කෙලෙස් දුරු කර විරාජිත
පෙව් දම් අමා ඔසුවෙන් ලොව සියල් සෙත
නිව්වා සසර දුක නිවනේ නිවී යන
මුනි දම් සහ මහ සඟ යන තුනුරු වන
පෙනි පෙනි මගේ බැති හදවත පුද දෙ මින
දැනි දැනි පිළිවෙතෙහි මැදි මාවත් ගමන
පැමිණෙමි නිවන වෙත බව දුක නවතමින
විමලසේන හෙට්ටිආරච්චි
අස්ගිරිවල්පොල
****
නාගිත හිමිගේ කඨින පින්කම
නාගිත මහ තෙරණුවෝ
සම්බුදු හිමි පාමුල
එකත් පසව ඇඳිළී බඳී
මෙසේ පවසතී
භගවත් බුදු පියාණෙනි
විපස්සි බුදුන් අබියස
මහා කඨින පූජාවක්
මින් කප් තිස් එකකට
පෙරදී මා සිදු කළා
මනුෂ්‍ය දිව්‍ය සම්පත් හා
සක්විති රජ සැපත් ලැබුණි
ගෞතම බුදු සසුනේ දී
රහත් ඵලය ලැබුවෙමි
දෙවිපහළ සුමේධ හිමි
පලාවෙල
රත්නපුර
****
වාසනාවන්
පවට බිය තෙරුවනෙහි හැසිරුණු කුල සිරිත් ගරු කළ මනාවන්
බසට ගුරු දෙගුරුන්ගෙ අවනත පෑ දසන් නොපෙනෙන සිනාවන්
බොලැට නාඹිය දෙවුර දෙවටොර ළමැද සහ පිට වැසු මනාවන්
දිගට පළලට රෙද්ද හැට්ටය ඇන්ද කුල කත වාසනාවන්
ගොකරැල්ලේ ජිනවංශ හිමි
****
ඉල් පොහොය
තෙල් මල් පහන් අරගෙන පන්සල් යනවා
සිල්වත් බොදුනුවෝ අට සිල් පිහි ටනවා
මල් වැසි දෙවිවරුන් අහසින් වස් සනවා
ඉල් පෝ දිනේ පුන් සඳ රැස් බැබළෙනවා
අමතා සැටක් වූ මහ රහතුනට එදා
සුමඟට දනන් යොමු කරවන දහම බෙදා
එම සැට නම ම දම් චාරික බවට යොදා
මෙම ඉල් පෝ දිනේ ඇරැඹී අඳුර මුදා
සුන් කොට සව් කෙලෙස් පව් මළ බැඳි නේක
පින්බර උතුම් ඉල් පුර පසළොස් දාක
නන් අයුරින් ම මහ පෙළහර පෑ සේක
තුන් බෑ ජටිලයන් දමනය කළ සේක
සිව්රක් ගඳ කිළියෙ වියනක් කරන ලදී
සිව්රක් ඉදිරි පිට සරසා තබන ලදී
ගෞරවනීය මෙත් බෝසත් ඇඳිලි බැදී
ගෞතම මුනිදු ගෙන් විවරණ ලබන ලදී
ඇටැම්පොල ඤාණිස්සර හිමි
දැරණියගල
****
දුන්හිඳ
කියන්නෙ
අකුරු හතරෙ
එකතුවක්
සිත මවන
ඇල්ලෙ
වතුර තියනවද
ලෝකයක් නො වෙයි මේ
වචන ගොඩක්
සංකල්ප ජාලයක්
පරගම්මන නන්ද
****
භූත
හිරුගෙ රැස්
සුළං රැල්
ලැබගනිමින්
මහ පොළොව උලා කා
පොළොවෙ දිය උරා බී
පොළොව මත දිවි ගෙවා
පොළොවටම පස් වෙනා
ලොව වෙසෙන
අප සැවොම
නිසැකෙන් ම
භූතයෝ
මාලබේ
කේ. ඩබ්ලිව් සිරිසේන
****
අනුරපුර
අසිරිය
අවරට ගිහින් හිරු අහසේ සැඟවෙනවා
පුන් සඳ ටිකෙන් ටික අහසේ පායනවා
රන් මැලි සෑය ඒ අතුරින් බැබළෙනවා
ගැමුණු කුමරු දෙව්ලොව සිට හිනැහෙනවා
අනුර පුරේ විසිතුරු ඇත කියන්නට
කොපමණ ලීව මුත් බැහැ නිම කරන්නට
අනු බුදු වැඩිය ඒ පින්බිම වඳින්නට
අපි යමු සැම දෙනම නිවනින් නිවෙන්නට
ශීලා ජයකොඩි
තඹුත්තේගම
****
මෙවර ජයග්‍රාහී කවිය
පැතුම
මෙත්තා ගුණය දස අතටම පැතිරේවා
කරුණා ගුණය හැම හදකම රජ වේවා
මුදිතා ගුණය බැලු බැලූ තැන දිස් වේවා
උපේක්ඛාව ඇති තැන නිති ජය වේවා
උස් මිටි කුල භේද සදහට දුරු වේවා
ලස්සන රටක් මේ මොහොතෙම බිහි වේවා
පින්කම්වලට හැමගේ සිත් යොමු වේවා
ලක් මව ලොව උතුම් රට බව පැවසේවා
ලයනල් දසනායක
පන්නිපිටිය
****
සාර ධර්ම සංග්‍රහයක්
සැම ඉරිදාම දම් පාසලෙ ළමයි ගැන
පහන් සිතක කවි ලියනව කියල ගුණ
දුටුවද ලියල තියෙනව සදහම් අරණ
සැමටම ලැබේවා සමිඳුගෙ බුදුසරණ
අම්මට තාත්තට ළමයිනෙ සලකන්න
ගුරුදෙගුරුන් කියන දේ සිතටම ගන්න
උදයේ සවස තම ආගම අදහන්න
මේ ලක් දිවට හොඳ පුරවැසියෙක් වන්න
පරෙයිගම වන්නිග වත්තේ
උපසේන බණ්ඩාර
****
සසර තරණය
එගොඩත් බැලිමි එගොඩත් නොපෙනෙන මානයකි
මෙගොඩත් බැලිමි මෙගොඩත් දුක් කන්දරාවකි
දෙගොඩම බැලිමි දෙගොඩත් යා කරන ඕඝයකි
මගිය පස් කඳ තොපට යන මග කියයි සකි
ආ මග නොබලන් මරුවා දකින්නේ
මැද මාවතේ යන මග නො පෙනෙන්නේ
තුන් ශික්ෂා අනුව පියවර තබන්නේ
අරි අට මග යි නිවනට මග පාදන්නේ
ඒ . ටී . සෙනෙවිරත්න
කොට්ටුන්න, මැලිගල්ල
****
දහම් පාසල
අලුයම හතර ඔරලෝසුවෙ නාද වුණා
ඉරිදා දිනක් නේ දැ’යි මට මතක් වුණා
දත කට මැදල පළමුව පිරිසුදු වෙන්නා
මව් පියො සමඟ සම්බුදු හිමි නමඳින්නා
පසුගිය ඉරිදා දම් පාසලෙ කරන ලද
පාඩම් ගාථා සැදැහෙන් කියනවා නාද
අම්මා - තාත්තා පවසන්නේ මගේ හොඳ
මුල් තැන දීම බුදු දහමට හොඳ නේද
හසලී දෙනෙත්යා
නන්දසාර දහම් පාසල
පරෙයිගම
සංස්කරණය
ජම්මික ප්‍රබෝධනී වැලිකල |
පසෙලාස්වක
අව
අටවක
අමාවක
පුර
අටවක
