ශ්‍රී බුද්ධ වර්ෂ 2563 ක් වූ බිනර අව අටවක පෝය දින රාජ්‍ය වර්ෂ 2019 සැප්තැම්බර් 22 වනදා ඉරිදා

ධර්ම දේශනාව:

අකුසල් දුරැර කුසල් වඩමු

න අන්තලික්ඛෙ න සමුද්ද මජ්ඣෙ - න පබ්බතානං විවරං පවිස්ස, න විජ්ජතී සො ජගතිප්පදෙසො - යත්ථට්ඨිතො නප්පසහෙථ මච්චුං. සුගත තථාගත අප සම්මා සම්බුදුරජාණන් වහන්සේ කපිලවස්තු නගරයේ වැඩවසන සමයෙහි සුප්පබුද්ධ ශාක්‍ය රජතුමන් අරබයා මෙම ගාථා ධර්මය දේශනා කොට වදාළ සේක. මෙම සුප්ප බුද්ධ රජතුමා අප බුදුරදුන්ගේ මාමා වන අතර, යශෝදරා දේවිය හා දෙව්දත්ගේ පිය රජතුමන් ය. තම දූ කුමරිය වැන්දඹු කොට බුදු වීමට වනගත වී යැයි ද, පුතා දේවදත්ත මහණකොට වෙනස්කම් කළේ යැයි ද යන කරුණු වරදවා තේරුම් ගෙන බුදුරදුන් කෙරෙහි වෛර බැන්දේ ය. වරෙක අප බුදුරදුන් ශ්‍රද්ධාවන්ත උපාසකයෙකුගේ ආරාධනාවකට අනුව මහ සඟන පිරිවරා දානයට වඩින කල සුප්පබුද්ධ රජු මග අවුරාගෙන, ක්‍රෝධයෙන් මතුර මතුරා සිටියේ ය. බුදුරජාණන් වහන්සේ එමඟ නොවැඩ පෙරළා වඩින කල ආනන්ද හිමියන් අමතා ආනන්දය, සුප්පබුද්ධ රජ කරන ලද්දේ මහා පාප කර්මයකි. එහි ප්‍රතිවිපාක වශයෙන් මෙයින් හත්වෙනි දින මාලිගාවේ දී ම පොළොව පලා ගෙන මරණින් මතු නිරයේ උපදින්නේ යැයි වදාළ සේක.

බිනර අව අටවක පෝය

බිනර අව අටවක පෝය සැප්තැම්බර් 21 වන දා සෙනසුරාදා අපර භාග 08.20 ට ලබයි. 22 වන දා ඉරිදා අපර භාග 7.50 දක්වා පෝය පවතී. සිල් සමාදන්වීම සැප්තැම්බර් 22 වන දා ඉරිදා ය.

මීළඟ පෝය සැප්තැම්බර් 28 වන දා සෙනසුරාදා ය.