ශ්‍රී බුද්ධ වර්ෂ 2563 ක් වූ වෙසක් පුර පසළොස්වක පෝය දින රාජ්‍ය වර්ෂ 2019 මැයි 18 වනදා සෙනසුරාදා

මල්වතු අස්ගිරි උභය මහා විහාරයන්හි උපසම්පදා පුණ්‍යෝත්සවය

මහා විහාර වංශික ස්‍යාමෝපාලි මහා නිකායේ මල්වතු හා අස්ගිරි උභය මහා විහාරයීය උපසම්පදා පුණ්‍යෙීත්සවය 2019 මැයි මස 18 වෙනිදාට යෙදෙන වෙසක් පුර පසළොස්වක පෝය දින සිට ජුනි මස 16 වෙනිදාට යෙදෙන පොසොන් පුර පසළොස්වක පෝය දින දක්වා පැවැත්වෙන බව මහා විහාරවංශික ස්‍යාමෝපාලි මහා නිකායේ මල්වතු මහා විහාර පාර්ශ්වයේ අතිපූජ්‍ය මහානායක තිබ්බටුවාවේ ශ්‍රී සිද්ධාර්ථ සුමංගල මහානායක මාහිමිපාණන් වහන්සේ සහ මහාවිහාරවංශික ස්‍යාමෝපාලි මහා නිකායේ අස්ගිරිය මහා විහාර පාර්ශ්වයේ අතිපූජ්‍ය මහානායක වරකාගොඩ ධම්මසිද්ධි ශ්‍රී පඤ්ඤානන්ද ඤාණරතන මහානායක මාහිමිපාණන් වහන්සේලා දෙනම ශාසන ගෞරවයෙන් නිකුත්කර තිබෙන නිවේදන දෙකකින් ප්‍රකාශයට පත්කර ඇත. උපසම්පදා පුණ්‍යෙීත්සවය සම්බන්ධ නිවේදන අනුව මැයි 18 (වෙසක් පෝදා) මැයි 26,ජුනි 02,ජුනි 10,ජුනි 16 ( පොසොන් පෝදා) යන පෝය දිනවල පෙරහර සහිතව ද, සෙසු දිනවල පෙරහර රහිතව ද උපසම්පදා පුණ්‍ය ක්‍රියා සිදුකෙරෙනු ඇත.

වෙසක් පුර පසළොස්වක පෝය

වෙසක් පුර පසළොස්වක පෝය මැයි මස 18 වන දා සෙනසුරාදා පූර්ව භාග 04.10 ට ලබයි.19 වන දා ඉරිදා පූර්ව භාග 02.41 දක්වා පෝය පවතී.සිල් සමාදන් වීම මැයි මස 18 වන දා සෙනසුරාදා ය.

මීළඟ පෝය මැයි 26 වන දා ඉරිදා