ප්‍රතිලාභ

මෙලොව ජය ලබන්නට කරමු ආයෝජනය
පැතුම් ගොනු රැසක්වී මුලාවේ ජීවිතය
එලොව වෙනුවෙන් සිතා කරමු ආයෝජනය
නැවතිලා සසර මග ජය ගනියි ජීවිතය

කිතුල්ගල
රත්නසේකර රූපසිංහ

බුදුන් පුදන මලක්

ගස මතම පරවෙන්න පිපි මලක් නොවෙමි මම
සාලයක බඳුන මත සිරවූ මල නොවෙමි මම
ලඳක වරලසක දවටන මල ද නොවෙමි මම
මඟුල අවමඟුල සරසන මලක් නොවෙමි මම

සිල්වතෙකු දෝතින් බුදු හිමි පුදන සුපිපුණු මල
බුදු ගුණය වනනසේ සුවඳ පතුරනා මල
කෙමෙන් පරවී යමින් අනියතය වඩන මල
ලොව දහම පහදන්න පිපුණු පින් ඇති මල

දෙහිවල, සරණංකර පාරේ,
අසුන්තා අමරසේකර

බුදු මග සුරකිමි

ආරිය සිංහල බොදු සිරිතට සේ
කාරිය පන්සිල් පද සුරැකෙන සේ
වීරිය භව ගමනින් ගොඩ එන සේ
දහිරිය ගමි තෙරුවන නිති සිරසේ

ඉසි, කෝ, මානය කුමටද සිත්සේ
රිසි සේ දන් පැන් පුද දෙමි දවසේ
විසි පෙර යහ හෙළ බොදු විරුවන් සේ
කිසි දින බුදුමග නොහරිමි මනසේ

විශ්‍රාමික පරිවේණාචාර්ය
පී.බී. ගුණරත්න
සුමනතිස්ස පිරිවෙන – දෙහිවල