ශ්‍රී බුද්ධ වර්ෂ 2563 ක් වූ උඳුවප් පුර පසළොස්වක පෝය දින රාජ්‍ය වර්ෂ 2019 දෙසැම්බර් 11 වනදා බදාදා

ධර්ම දේශනාව:

මහින්දාගමනය දුමින්දාගමනය හා උඳුවප් උදාව

වෙසක් පෝය සකල ලෝකවාසී බෞද්ධ ජනතාවට ම ඉතා වැදගත් පොහොය දිනයක් වනුයේ සම්බුදු තෙමඟුල හේතුවෙනි. ශ්‍රී ලාංකේය බෞද්ධයන් වන අපට ඉතාමත් වැදගත් මෙන්ම සුවිශේෂී පොහොය දෙකකි. එනම් පොසොන් පොහොය හා උඳුවප් පොහොය යි. බුදුරදුන්ගේ දහම් පණිවුඩය රැගෙන මිහිඳු මහරහතන් වහන්සේ ලක්දිවට වැඩම කරන ලද්දේ පොසොන් පොහොය දිනය ක ය. ශ්‍රී ලාංකේය සමාජය නව ගමන් මගකට යොමු කළ මහින්දාගමනය හුදු ධර්ම දූත සේවයක් පමණක් නොවුණි.” එය ආගමික ඉතිහාසයේ සිදුවූ වඩාත් සංවිධානාත්මක ම ධර්ම දූත සේවාව බව ප්‍රකාශ කිරීම අතිශෙයෝක්තියක් නොවේ. දෙවැන්න දුමින්දාගමනය යි. එනම් ජය ශ්‍රී මහා බෝධීන් වහන්සේ වැඩමවීම යි. එය සිදුවූයේ අද වැනි උඳුවප් පුර පසළොස්වක පොහොය දිනක ය. බෝධීන් වහන්සේ ශ්‍රී ලංකාවට වැඩමවීම හුදු දූත සේවාවක් පමණක් ම නොවූ බව ඉතිහාසය විමර්ශනාක්ෂිතයෙන් විමසන්නෙකුට පෙනෙන කාරණාවකි. බෝධීන් වහන්සේ පිළිබඳ කථනයට, මහින්දාගමනය පිළිබඳ පූර්විකාවක් සිදුකර ගැනීම වඩාත් යෝග්‍යය. ලංකාව සහ ඉන්දියාව අතර තිබූ රාජ්‍ය තාන්ත්‍රික සබඳතාවන්හි ප්‍රතිඵල ලෙස ලංකාවට බුදුදහමේ පණිවුඩය රැගෙන එන ලද්දේ ධර්මාශෝක රජුගේ පුත්‍රයෙකු වූ මහින්ද තෙරුන් වහන්සේ ප්‍රමුඛ ඉට්ඨිය, උත්තිය, සම්බල, භද්දසාල, සුමන සාමණේර යන භික්ෂූන් සහ භණ්ඩුක යන උපාසක ඇතුළු සත් දෙනෙක් විසිනි.

උඳුවප් පුර පසළොස්වක පෝය

උඳුවප් පුර පසළොස්වක පෝය දෙසැම්බර් 11 වනදා බදාදා පූර්වභාග 10.59 ට ලබයි. 12 වනදා බ්‍රහස්පතින්දා පූර්වභාග 10.42 දක්වා පෝය පවතී. සිල් සමාදන්වීම 11 වනදා බදාදා ය.

මීළඟ පෝය දෙසැම්බර් 19 වනදා බ්‍රහස්පතින්දා ය.