ශ්‍රී බුද්ධ වර්ෂ 2563 ක් වූ උඳුවප් පුර පසළොස්වක පෝය දින රාජ්‍ය වර්ෂ 2019 දෙසැම්බර් 11 වනදා බදාදා

බුදුසරණ පුවත්පතේ මාධ්‍යවේදීනී හේමමාලා රන්දුනු මහත්මිය විසින් සම්පාදිත “අමාදහම් වැස්ස” නම් වූ බෞද්ධ ග්‍රන්ථය ජාතික සිංහල පෙරමුණේ නායක, ශ්‍රී ලංකා භික්ෂු විශ්වවිද්‍යාලයේ බෞද්ධ හා පාලි අධ්‍යයන අංශයේ ජ්‍යෙෂ්ඨ මහාචාර්ය පාතේගම ඤාණිස්සර ස්වාමීන්ද්‍රයන් වහන්සේ වෙත පිළිගැන්වූ අයුරු.

බුද්ධාභිවන්දනා සර්වරාත්‍රික බුදුගුණ දේශනාවක් 28 දා

ඓතිහාසික අනුරාධපුර ස්වර්ණමාලි මහා චෛත්‍ය රාජයාණන් වහන්සේ අබියස බළංගොඩ රාධ හිමියන් විසින් පවත්වනු ලබන බුදුගුණ දේශනා පින්කමක් මේ මස 28 වැනිදා සවස් කාලයේ දී පැවැත්වේ. සම්මාදිට්ඨි ජාත්‍යන්තර සංවිධානය මගින් එම පින්කම සංවිධානය කරයි. 27 වැනිදා මහ සෑ සළපතල මළුව ස්වභාවික සකසාගත් සුවඳ පැණින් දෝවනය කරන අතර, 28 වැනිදා සවස සෑ රදුන් වහන්සේට මල් කඤ්චුකය පැළඳවීම සිදුකෙරේ. සිව් බුදුවරයන් වහන්සේලා සිහි ගන්වමින් මහ සෑ රජුන්ගේ සිවු රූප තැන්පත් කෙරෙන ප්‍රතිමා වහන්සේලා අබියස සුගත චීවර, අෂ්ට පරිෂ්කාර, විජිනිපත්, සහිත අෂ්ඨපාන ගිලන්පස ආදී තැන්පත් කෙරේ. බුද්ධ පූජාව කහගොල්ලේ සෝමවංශ නා හිමියන් විසින් මෙහෙයවනු ඇත. සවස 6 ට බුදුගුණ දේශනාව ආරම්භ වන අතර, එය පසුදා උදෑසන 6 දක්වා පැවැත්වේ. දේශනාව අවසන සෑ මළුවේ සිවු බුදුරජාණන් වහන්සේලාට ද විජය ශ්‍රී බෝධිරාජයාණන් වහන්සේ ප්‍රමුඛ අටමස්ථානයට ද දක්ෂිණෝදක පූජාව, කැවිලි, පලතුරු සහිත ක්ෂිරපායාස පූජාව පවත්වා වැඩමවා වදාළ ශතාධික සංඝ රත්නය උදෙසා මහා සංඝගත දක්ෂිණාව පැවැත්වීමෙන් පින්කම අවසන් වේ. පැමිණෙන සැදැහැවතුන් උදෙසා ජලය, ගිලන්පස, දන්සල් මෙන්ම සනීපාරක්ෂක පහසුකම් සලසා ඇත.

උඳුවප් පුර පසළොස්වක පෝය

උඳුවප් පුර පසළොස්වක පෝය දෙසැම්බර් 11 වනදා බදාදා පූර්වභාග 10.59 ට ලබයි. 12 වනදා බ්‍රහස්පතින්දා පූර්වභාග 10.42 දක්වා පෝය පවතී. සිල් සමාදන්වීම 11 වනදා බදාදා ය.

මීළඟ පෝය දෙසැම්බර් 19 වනදා බ්‍රහස්පතින්දා ය.