භව දුකෙන් මිදෙනවා

මරණයට බිය වුණත් නැතත් අපි මැරෙනවා
සිතන අය ඒ අනුව ජීවිතය ගෙවනවා
අරි අටඟි මගට අනුගත ව පිය මනිනවා
මෙවැනි අය ඝොර බිරම් සසර ගිනි නිවනවා

මෙම දහම් හද සිතට සිසිල ගුණ ගෙනෙනවා
එම බලෙන් දිග සුසුම් සමඟ සිත නිවනවා
දොර තුනෙන් සංවරව ජීවිතය ගෙවනවා
සිත නිවන් දකින විට භව දුකෙන් මිදෙනවා

බමුණාකොටුවේ .
මැණික් විජේසුන්දර

ජීවන ගමන

මිනිසා ඉපිද හැඩි දැඩි වුණ දිනේ සිට
දෙපයින් ගමන් යයි සිය වැඩ කෙරී මට
එනමුදු සොබා දහමින් වන පෙරළිය ට
ඒ හැම වෙනස් වනවා නො සිතුව ලෙස ට

හිස මත තබාගෙන ඉසිකෝ මද මානේ
මිනිසා යෙදෙයි දුසිරිතෙ දින දින ගානේ
කෙලෙසක සිදුවෙයිද දිවි මගෙ අව සානේ
පිළිබඳ කිසිවකුට නිසි වැටහුම නෑනේ

විමල් කේ. විජේනායක
පිළියන්දල

සය දොර අරමුණු හැර

ඇස කන නැහැය දිව කය සහ සිරුර සිත
රුව හඬ සුවඳ රස පහසද දහම වෙත
අනිත දුක අතත යන තිලකුණකි මිත
දැනෙති මේ කයෙහි කිසි හරයක් නොමැත

දකිනු මැන දහම යනු පිළිවෙළක් මත
දකිනු සිත සමඟ තුන්දොර දහම මත
පුරනු පිළිවෙතම වෙයි සිත සමහිත
හරිනු මෙම සසර දොස දුරු කරනු ඇත

තාරක

එක පහන් දැල්ලක

එළියෙන් දකිමි මුනිඳුන්
කුමට ද?
අසූ හාර දහසක්

ජෝ.නවරත්න
සඳලංකාව