UNICODE

 

[UNICODE]

මුල් පිටුව | බොදු පුවත් | කතුවැකිය | බෞද්ධ දර්ශනය | විශේෂාංග | වෙහෙර විහාර | ඉංග්‍රිසි ලිපි | පෙර කලාප | දායකත්ව මුදල් |

බුදුසරණ අන්තර්ජාල කලාපය

ධම්මපද සැහැල්ල - 3 කොටස

12. සාරංච සාරතො ඤත්වා - අසාරංච අසාරතො,

තෙ සාරං අධි ගච්ඡන්ති - සම්මා සංකප්ප ගොචරා

හරි දැකීමක් තිබෙන - ලෝකයේ නැණවැත්තෝ සරු නිසරු සියලු දෙය - හොඳින් වටහා ගනිති. ඒ අනුව සියලු දෙය, හොඳින් වටහා ගනිති. ඒ අනුව ටිකෙන් ටික, කෙළෙස් බර ලිහිල් කොට - අජර වූ අමර වූ - නිවන හඳුනා ගනිති...

හිතවතුනි, හොඳ නරක, දෙකෙන් පිරි ලොවක් මැද - සිටින අප හොඳ නරක - හොඳින් හැඳිනිය යුතුය. හොඳ දෙයක් නරක ලෙස - නරක දේ හොඳක් ලෙස - පෙනෙන්නට ඉඩ තිබේ . පරෙස්සම් විය යුතු ය. තුණුරුවන් හැඳින ගෙන - දිවිය ගත කළ යුතුය. ඒ අතර අරි අටැඟි - මග අනුව යා යුතු ය. එසේ වූ කිසිවකුට - මග නොවරදින්නේ ය. මෙලොව පරලොව දෙකේ - සැපත් හිමි වන්නේ ය.

13. යථාගාරං දුච්ඡන්නං - වුට්ඨි සමති විජ්ඣති,

එවං අභාවිතං චිත්තං - රාගො සමති විජ්ඣති

වැරැදි ලෙස සෙවිලි කළ - ගෙය තුළට වැසි ජලය - වසින විට ඉතාමත් - පහසුවෙන් එන්නේය. භාවනා ආදියෙන් - නොහික්මුණු සිත තුළට - ඒ ලෙස ම ‘රාගය ‘ ද පහසුවෙන් එන්නේ ය.

14. යථාගාරං සුච්ඡන්නං - වුට්ඨි න සමති විජ්ඣති

එවං සුභාවිතං චිත්තං - රාගො න සමති විජ්ඣති

ගෙයක් නිසි පරිද්දෙන් - සෙවිලි කර තිබේ නම්, වසින විට වැසි ජලය ඇතුළට නො එන්නේ ය. භාවනා කිරීමෙන් සුසංවර සිත තුළට - ඒ ලෙසම කිසි විටෙක ‘රාගය’ නො එන්නේ ය.

හිතවතුනි, මේ මිනිස් සිත තුළට නිරුතුව පසිඳුරන්ගේ මගින් අරමුණු ලැබෙන්නේ ය. ලැබෙන අරමුණු අනුව සිත තුළට ගලා එන නොයෙක් සිතුවිලි අතර ‘රාගය’ ද බලවත් ය. අසංවර සිත තුළට ‘රාග‘ සිතුවිලි ගලයි. සුසංවර සිත තුළට ‘රාග‘ සිතුවිලි නො එයි. ‘රාග‘ සිතුවිලි නිසා සිත කිලිටි වන්නේය. කිලිටි සිත පාපයට-  නැඹුරු වන්නේ ය. ඒ නිසා තුන් දොරින් - පව්ම සිදු වන්නේය. දුකින්පිරි මේ සසර - තවත් දික්වන්නේය. පාපයට නැඹුරු නැති - තුන් දොරින් නිරතුරුව - පින්ම සිදු වන්නේ ය. සසර කෙටි වන්නේ ය.

15. ඉධ සොචති පෙච්ච සොචති - පාපකාරී උභයත්ථ සොචති

සෝ සොවති සො විහඤ්ඤති - දිස්වා කම්මකිලිට්ඨ මත්තනො

පව් කරන තැනැත්තා - මෙලොවදී ශෝක වෙයි. පරලොවේදීත් ඔහුට - ශෝකය ම උරුම වෙයි. තමා තුන් දොරින් කළ - පාපයන් දැකීමෙන් - සසර වසනා තුරා දුක්ම විඳගන්නේ ය.

16. ඉධ මොදති, පෙච්ච මොදති - කත පුඤ්ඤෝ උභයන්ථ මොදති

සො මොදති සො පමොදති - දිස්වා කම්මවිසුද්ධි මත්තනො

පින් කරන තැනැත්තා - මෙලොව දී සතුටු වෙයි. පරලොවේදීත් ඔහුට - සතුට හිමි වන්නේ ය. තමා තුන් දොරින් කළ - මහා පින් දැකීමෙන් - සසර වසනා තුරා - සැපම විඳ ගන්නේය.

හිතවතුනි, හිත, වචන - කය, කියන තුන් දොරින් - පව් කරන තැනැත්තා - දෙලොව දී දුක් විඳී. පින්කරන තැනැත්තෝ මෙලොව පරලොව දෙකේ - දුක්විඳීමෙන් තොරව, සැපම විඳ ගන්නෝ ය. අසංවර තුන්දොරින් - කළ දෙයින් දුක් ලැබේ. සංවරව කළ දෙයින් - නිසැකව ම සැප ලැබේ.

මතු සම්බන්ධයි

 

දුරුතු අව අටවක පෝය

දුරුතු අව අටවක පෝය ජනවාරි 07 වන දා බ්‍රහස්පතින්දා පූර්ව භාග 04.43 ට ලබයි.
8 වන දා සිකුරාදා පූර්වභාග 03.45 දක්වා පෝය පවතී.සිල් සමාදන්වීම 07 වන දා බ්‍රහස්පතින්දා ය.
මී ළඟ පෝය ජනවාරි 14 වන දා බ්‍රහස්පතින්දා ය.


පොහෝ දින දර්ශනය

Second Quarterඅව අටවක

ජනවාරි 07

New Moonඅමාවක

ජනවාරි 14

First Quarterපුර අටවක

ජනවාරි 23

Full Moonපසෙලාස්වක

ජනවාරි 29

2010 පෝය ලබන ගෙවෙන වේලා සහ සිල් සමාදන් විය යුතු දවස


මුල් පිටුව | බොදු පුවත් | කතුවැකිය | බෞද්ධ දර්ශනය | විශේෂාංග | වෙහෙර විහාර | ඉංග්‍රිසි ලිපි | පෙර කලාප | දායකත්ව මුදල් |

© 2000 - 2010 ලංකාවේ සීමාසහිත එක්සත් ප‍්‍රවෘත්ති පත්‍ර සමාගම
සියළුම හිමිකම් ඇවිරිණි.

අදහස් හා යෝජනා: [email protected]