මාරය මට අත වනනු එපා

මරණ මංචකයේ
මහ යුදයක් කොට
පෙර පිනකින්
යළි පණ ආවා
කළ යුතු යුතුකම්
ඉතිරිවෙලා ඇත
එ බරින් නිදහස් විය යුතු වේ
පින් කර ගන්නට ඉඩ දෙනු මැන
මාරය මට අත වනනු එපා
පාසල හැර ගිය
පුතුට තවම නැත
ගැළපෙන රැකියාවක් ලැබුණේ
දීග නොගිය දුව
වයස පිරී ඇත
පසුවේ තවමත් ගෙයි මුල්ලේ
පින් කර ගන්නට ඉඩ දෙනු මැන
මාරය මට අත වනනු එපා
සොච්චම් පඩිපත
සුළඟේ පාවේ
අඩක් නිම වූ නිවස ද අඳුරේ
ණයකරුවෝ මගෙ
පසුපස එළවති
මහමෙර බර පොදි මගෙ හිසෙහි
පින් කර ගන්නට ඉඩ දෙනු මැන
මාරය මට අත වනනු එපා

ආචාර්ය
රත්නපාල වික්‍රමසිංහ