ශ්‍රී බුද්ධ වර්ෂ 2565 ක් වූ මැදින් පුර පසළොස්වක පෝදා 2022 මාර්තු 17 බ්‍රහස්පතින්දා

සදහම් අරණ

මෙවර ජයග්‍රාහී නිර්මාණය

වස විෂෙන් තොර ආහාරයක අගය

පරිසරයේ තිබෙන ගහකොළ, මල් ඉවත දමන ආහාර, සතුන්ගේ මළ මූත්‍ර, රොඩු වැනි ස්වභාවික දේ යොදා කාබනික පොහොර නිපදවයි. එම පොහොර යෙදීම පරිසරයට ද හිතකර ය. ඵලදායී සරු අස්වැන්නක් ලබා ගත හැකි අතර වස විෂෙන් තොර ආහාරපාන පරිභෝජනයට ඉතා සුදුසු ය. ඒ මඟින් අපට විශාල ආර්ථික ලාබයක් ලබා ගත හැකි ය. පරිසරයට කිසිදු රසායනික ද්‍රව්‍යයක් එකතු නොවන නිසා වගාවට හිතකර මෙන්ම සතුන් ද විනාශයට පත්වීම සිදු නොවේ. කාබනික පොහොර භාවිතය නිසා ලෙඩ රෝගවලින් තොර නීරෝගි දිවි පෙවෙතක් ගත කළ හැක. කුඩා අපත් වසවිෂෙන් තොර ආහාරය අගය කරමු.එය පරිභෝජනය කරමු.

ශමින්ද්‍රි පංචලී
5 ශ්‍රේණිය
රන්පොකුණගම විද්‍යාලය
නිට්ටඹුව

****

මැදින් පෝය වර්ණනාව

මැදින් පොහොය සම්බුද්ධ ශාසන ඉතිහාසයේ අතිශය වැදගත් දිනයකි. සම්බුද්ධ ශාසනය තුළ වැදගත් කරුණු රාශියක් සිදු වූ දිනයකි. භාග්‍යවතුන් වහන්සේ නෑදෑ හිතමිතුරන්ට සහ ජන්ම භූමියට කළගුණ සැලකීම සඳහා කිඹුල්වත් නුවරට වැඩම කොට සුද්ධෝදන රජුට දහම් දෙසීමත්, එහිදී රජතුමා සෝවාන් ඵලයට පත්වීමත්, යශෝධරා දේවිය උදෙසා සඳ කිඳුරු ජාතකය දේශනා කිරීමත්, රාහුල සහ නන්ද කුමාරවරු ශාසනයේ පැවිදි වීමත් මේ උතුම් පෝදා සම්බන්ධ සිදු වූ සිදුවීම් අතර වේ.

බෝගමුවේ නන්දසාර හිමි
02 ශ්‍රේණිය
ශ්‍රී සංඝබෝධි පරමානන්ද පුරාණ විහාරය, පොතුහැර

****

මැදින් පෝය

මැදින් පුන් පොහොය උදාවන්නේ මාර්තු මාසයේ දී ය. මෙ පොහොය ද ලාංකීය අපට මෙන් ලෝකවාසී බෞද්ධයන්ට ඉතා වැදගත් දවසකි.

බුදුරජාණන් වහන්සේ සිය පියාණන් වන සුද්ධෝදන රජු සහ සිය ශාක්‍ය වංශික ඥාතීන් බැහැදැකීමට විසිදහසක් සංඝයා වහන්සේ පිරිවරාගෙන කිඹුල්වත් පුරය බලා වැඩම කරන්නේ මැදින් පොහොය දිනක ය. ඒ සිද්ධාර්ථ කුමාරයා වශයෙන් අභිනිෂ්ක්‍රමණය කිරීමෙන් සත් අවුරුද්දකට පසුව ය. අභිමානවත් ශාක්‍යයින්ගේ මානය දුරුකරවාලීම සඳහා බුදුන් වහන්සේ යමාමහ පෙළහර පෑවේ එම ගමනේ දී ය. දායාද ඉල්ලා පැමිණි රාහුල කුමරුන් පැවිදි බවට පත් කිරීම ද නන්ද කුමරු පැවිදි බවට පත්වීමද මේ පෝය දිනයට සම්බන්ධය.

දීත්ම සජාර ජයසිංහ
6 ශ්‍රේණිය
සිරි විමලසිරි ඉංගී‍්‍රසි දහම් පාසල, පොල්පිටිමූකලාන

****

අපේ උරුමය

ශ්‍රී ලංකාවේ මධ්‍යම කඳුකරය, ශ්‍රී පාද අඩවිය, සීගිරිය ඓතිහාසික නගරය, මහනුවර පූජා නගරය, දඹුලු විහාරය, අනුරාධපුර ඓතිහාසික නගරය, පොළොන්නරුව ඓතිහාසික නගරය, ගාලු කොටුව, හෝර්ටන්තැන්න සහ සිංහරාජ වැසි වනාන්තරය අපේ උරුමයන් වශයෙන් ප්‍රකාශයට පත්කර ඇත.

මෙම වස්තූන් අපේ උරුම ලෙස නම් කර ඇත්තේ ඒවා අපට පමණක් නොව මුළු ලෝකයට ම එකසේ වැදගත් වන නිසා ය. පොදුවේ ගත්කල මේ සියලු ම වස්තූන් පුරා විද්‍යාත්මක වටිනාකමක් ඇති වස්තූන් වෙයි. පුරවැසියන් වශයෙන් මෙම වස්තූන් ගේ වටිනාකම සොයා බැලිය යුතු ය. ඒවා ආරක්ෂා කිරීමට සිත් පහළ වන්නේ එම වස්තූන් පිළිබඳ ලබන දැනුම හේතුවෙනි.

අපේ අපේ උරුමයන් දැක බලා ගැනීමට දහස් ගණන් විදේශිකයෝ අප රටට දිනපතා පැමිණෙති. ඔවුහු ඒවා ගැන සොයා බලා ඒවා පිළිබඳ මවිතයට පත් වෙති. සැබැවින් ම මෙම අපේ වටිනා උරුමයන් රැක ගැනීමත්, අගය කිරීමත් දරුවන් වන අපගේ මහඟු වගකීමකි.

ඩී.පී. අනූපමා නෙත්සරණි
8 ශ්‍රේණිය
සුවිසුද්ධාරාමය දහම් පාසල - වැල්ලවත්ත