|
විශ්ව වෙසක්
සැකි මුනි සිහ අපරි අමර වජිර විරාගී
අප්‍රමාද සසර පුරා නිවා සරාගී
තිලෝ තිලක ආර්ය මහිම දෙසූ සමාධි
යළිත් වෙසඟ සඳ නැගුණා විශ්ව ගවේසී
සිරි සදහම් තුන් පිටකය හඬින් හඬ නගා
මුනි තෙමඟුල සත සනහන බවුන් වඩ වඩා
ඉපිද මැරෙන යළි ඉපදෙන සෝක දුක් නිවා
ධර්ම ධජය හදේ නගමු නිවන් සිරි පතා
උතුම් වෙසඟ බඹ විහරණ නිර්මල පිවිතුරු
සිරිමත් සිරි සද්ධර්මය ලොවි ලොව් තුරු
සිරි ධිති මති තේජ අසිරි විනීත හද පිරූ
සුගන්ධනී වෙසඟ දිනය නමදිමු අමයුරු
ශාස්ත්‍රපති
චරිත වික්‍රමසිංහ
(කලාභූෂණ)
****
තෙමඟුලේ අසිරිය
වෙසක් සඳේ රැස් දහරින්
ලොවම එළිය කරමින්නේ
ලුම්බිනියේ මල් සුවඳට
දෙව් බඹුනුත් ඇහැරෙන්නේ
සල් සිසිලස විඳිමින්නේ
සිදුහත් කුමරු උපදින්නේ
රන් සියපත් සුපිපෙන්නේ
පියුම් සුවඳ පැතිරෙන්නේ
දස පාරමි පුරා තුටින්
සංසාරය නිම කරමින්
වෙසක් සඳත් බබළවමින්
ගෞතම බුදු සමිඳු නමින්
වෙසක් සඳ බැස යමින් තිබුණා
මිහිකතත් සෝ සුසුම් හෙලුවා
දහම් අමා රස දසත පතුරා
බුදු සමිඳා පිරිනිවන් පෑවා
කාංචනා විජේතුංග
ශ්‍රී ඤාණාතිලක දහම් පාසල
පන්විලතැන්න
****
වෙසක් සඳ
සිව් මහ දෙවිඳු කළ ඇරැයුම ලැබුණ සඳ
බෝසත් දෙවිඳු පා සතහට සෙනෙහෙ හද
සත් රත් නෙළුම් මත ලුම්බිනි උයන මැද
සම්බුදු උපත දුටුවා පුර වෙසක් සඳ
වට්ටාරම ටී . ඇම්. පොඩිරාලහාමි
වට්ටාරම
ඉඹුල්ගස්දෙනිය
****
භගවත් පියාණෙනි
ගොයුම් ගොත් සුගත භගවත් පියාණෙනි
සියුම් සිත් සමාධිය මත සුව සැදුනී
පියුම් ගැබ තුළින් එන රොන් සුවඳ වැනී
නිවන් සිත ඔබේ පා යුග වඳිමි හිමි
පුරන් විසිනි
****
සිතිවිලි
බුදු පුත් පුංචි රාහුල හිමියන් ලෙසට
හැදුණොත් ඕවාද පිළිපදිමින් හොඳට
කොතනත් බැබළේ ලු සඟ රුවනක් ලෙසට
හිතුණොත් බැරි නෑලු අවාවාදය යි මට
පී. බී ගුණරත්න
සුමනතිස්ස පිරිවෙන
දෙහිවල
****
ගසක් මුල දී
ගසක් මුලදි උපත ලබා ගසක් මුලදි සැපත ලැබුව
ගසක් මුලම විපත තබා මුළුතුන් ලෝකෙටම පබුව
වෙසක් මහේ පුන් පෝදා සිදුහත් බෝසතුන් බුදුව
නමක් තැබු විශ්වය තුළ සදාතනික බවින් යුතුව
සාම විනිසුරු විශ්‍රාමික විදුහල්පති
ඩී.එම්.දිසානායක
යටගම
රඹුක්කන
****
ස්ථම්භයක් ම යි
බුදු හිමියනි
ඔබ කෙරෙහි
මා සිත නැඟුණා
බුදු භක්තිය
කිසිදාකත්. කිසිවකුටත්
බිඳලිය නොහැකි
ඒෂිකා ස්ථම්භයක්ම යි
සත්තකින්ම
අගලවත්තේ
දයා දහනායක |
අමාවක
පුර
අටවක
පසෙලාස්වක
අව
අටවක