බිනර අමාවක 2015.10.12

මව්පියවරුන් වෙත සැළකීම

මවකගේ සෙනෙහස, පියෙකුගේ සෙනෙහස අන් සියල්ලටම වඩා දරුවෙකුට වටිනා ම සෙනෙහසකි. මවකගෙන්, පියෙකුගෙන් ලැබෙන එම සෙනෙහස දරුවකු වෙත අන් කවර අයුරකින් වත් ලැබිය නොහැකිමය. මව්පියවරු දරුවන්ට සිව්බඹ විහරණය පතුරවනුයේ ද ඒ නිසාමය. එසේ සිව් බඹ විහරණයෙන් හෙබි දෙමාපියන්ටද ඇති වටිනාම සම්පත දරු සම්පතය.

දරුවන්ටද මෙලොව වටිනාම වස්තුව ස්වකීය මව්පියවරුමය. සමාජයේ වෙසෙන දරුවන්ට හෝ මව්පියවරුන්ට මව්පියවරුන්ගේ හෝ දරුවන්ගේ වටිනාකම පිළිබඳ අමුතුවෙන් පැහැදිලි කර දිය යුතු නොවේ. ඊට හේතුව නම් පරපුරෙන් පරපුරට පවත්වාගෙන එන උසස් ගුණ දහම් අතර මව්පියවරු තම දරුවන් නැණ ගුණයෙන් මෙන්ම ගුණ දහමෙන්ද ඔවුන් පෝෂණය කිරීමට නිරන්තරයෙන් පෙළඹී ඇති හෙයිනි. එමෙන්ම එබඳු ගුණවත් මව්පියවරුන්ගේ දරුවන්ද වැඩිවියට පත් වී මව්පිය සමාජයෙන් ලද ආදර්ශයට අනුව ස්වකීය මව්පියවරුවෙත ජීවිත පරිත්‍යාගයෙන් රැක බලා ගන්නා හෙයිනි.

එබඳු උදාර ආදර්ශ බෞද්ධ සාහිත්‍යය පුරාම පැතිරී පවතී. අසිරිමත් බෝසත් සිරිත මෙන්ම අසිරිමත් සම්බුදු සිරිත අනුගමනය කරන බෞද්ධ ජනතාව එබඳු දෑ අධ්‍යයනය කරමින් ආදර්ශයට ගැනීම උදාර බෞද්ධ සම්ප්‍රදායයි. ඒ අපගේ පෞරාණික උරුමයයි.

කලාතුරකින් මවක්, පියෙක් තම නෙත් දෙකවන් දරුවාට විවිධ කරදර හිංසා කරන ලද අවස්ථා වරින්වර මාධ්‍ය වාර්තාකරනු පෙනේ. එමෙන්ම තමන් හදා වඩා පෝෂණය කළ මව්පියවරු වෙත කලාතුරකින් හෝ නොසලකා හරින ලද අවාසනාවන්ත දරුවන් ගැන ද වාර්තාවන අවස්ථාද නැතුවාම නොවේ. මෙලොව බිහිවන දරුවකු කලාතුරකින් හෝ මව්පිය වරදින් ජීවිතයෙන් වන්දි ගෙවීමට සිදු වන්නේ නම් එය අවාසනාවන්ත අවස්ථාවකි. එමෙන්ම ආදරණීය මවකගෙන් දරුවා බිව් කිරි කඳුලක ණයෙන් නිදහස්වීමට මව්පිය දෙපළට ජීවිතාන්තය දක්වා සැලකිලි සංග්‍රහ කළ ද ඉන් නිදහස් විය හැකි නොවේ. එබඳු ගුණ ඇති මව්පියවරු දරුවන්ට ද වාසනාවකි.

දරුවන්ගේ දියුණුවට නිරන්තරයෙන්ම මව්පියවරුන්ගේ රැකවරණය, ආශීර්වාදය අත්‍යවශ්‍යය. මව්පියවරු අසරණ වූ විට දරුවන්ද මව්පියවරු වෙනුවෙන් දිවි පරදුවට තබා කටයුතු කිරීම පැසසිය යුත්තකි.

කලාඔයේ දිය නාමින් සිටි මවක් මිනීමරු කිඹුලකු විසින් සිය ගොදුරක් බවට පත්කර ගැනීමට උත්සාහ කළ සුළු මොහොතකින් තම දිවි දෙවැනි කොට සලකා සෙනෙහෙබර පුතනුවන් මිනීමරු කිඹුලාගෙන් ආදරණීය මෑණියන්ගේ ජීවිතය ජීවත් කරවීමට කලාඔයට පැන්නේ ය. සිය පුතා උත්සාහය අත් නොහැරියේ ය. ආදරණීය අම්මාගේ ජීවිතය වෙනුවෙන් ඒ දහනව වියැති තරුණ පුතා ජීවිතය පරදුවට තැබුවිය. දැඩි සේ වෙර යොදා ගත් ඒ උත්සාහයෙන් ආදරණීය අම්මාගේ ජීවිතය ජීවත් කරවීමට ඒ පුතාට ශක්තිය ලැබිණි. එබඳු පුතුන් දික්වැව සේනපුරට පමණක් නොව රටට සමාජයට මෙන්ම ලෝකයටම ආදර්ශයකි. එබඳු වීර පුතුන් රටට සමාජයට සම්පතකි.

මව්පියවරුන්ට නොසලකා හරින දරුවන්ට එම තරුණ පුතා නිහඬව ම මහත් ආදර්ශයක්ම සපයනු ලැබේ. එබඳු බෝසත් ගුණැති දරුවන් වෙත සමාජයේ අවධානය යොමුවීම පමණක් ප්‍රමාණවත් නොවේ. එබඳු පුතුන් ඇගැයීමට ද ලක් කළ හැකිවන්නේ නම් බෝසත් ගුණැති දරුවන් පහළවීමට එය හේතු විය හැකි ය. මව්පිය වැඩිහිටි ආදීන්ගේ ගුණ නිතර දෙවේලෙහි දරුවන්ගේ හදවත් තුළ තැන්පත්ව තිබිය යුතු වේ. එවිට කලාතුරකින් හෝ මව්පියන්ට නොසලකා හැරීමට දරුවන්ට ඉඩක් නොලැබෙනු ඇත.