ධම්මපද සැහැල්ල - 5 වන කොටස

බණ්ඩාර මඩුගල්ලේ

අප්පමාද වග්ගය

21.අප්පමාදෝ අමත පදං - පමාදෝ මච්චුනො පදං
අප්පමත්තා න මීයන්ති - යෙ පමත්තා යථා මතා

පින් දහම් කරන්නට - පමා නැති තැනැත්තා - කිසි පමාවක් නැතිව - නිවන වෙත යන්නේ ය. පමා වන තැනැත්තා -දුකට පත් වන්නේය. ලෝකයේ සනාතන - දහම එය වන්නේය. පමා නැති තැනැත්තෝ - මරණයෙන් මිදී යති. පමා වන්නෝ නිසැක ලෙස මරණය ම ලබති.

හිතවතුනි , තුන් දොරින් - සංවරව පින් කරන - තැනැත්තෝ නිරතුරුව - නො පැරදී ජය ලබති. තුන් දොරින් අසංවර -පව් කරන තැනැත්තෝ - නිරතුරුව දුක් විඳිති. දැඩි පරාජය ලබති. පින් කරන තැනැත්තා - සමාජය පිළි ගනී. මරණයෙන් පසුව නම- අමරණීයව රැකේ. පව් කරන්නා ලොවේ - කිසි කෙනෙක් නො සලකති. මැරෙන්නට පළමුව ද- හේ මැරුණු කෙනෙකු මෙනි.

22. එතං විසෙසතො ඤත්වා - අප්පමාදම්හි පණ්ඩිතා
අප්පමාදෙ පමොදන්ති – අරියානං ගොචරෙ රතා

මා, නොපමා දෙකේ- වෙනස දත් නැණැත්තෝ - නිතර බුදු මග අනුව - ජීවිතය ගත කරති. එසේ කල් ගෙවීමෙන් ලැබෙන මහ කුසලයෙන් -මෙලෝ පරලෝ දෙකම සරු කරති. සතුටු වෙති...-

හිතවතුනි- නුවණැතිව , පමා- නොපමා දෙකේ වෙනස දැන ජීවිතය- හසුරුවා ගත යුතුය. තුන් දොරින් සුසංවර -පමා නැති ජීවිතය- අඩුපාඩුවක් නැතිව- සරුසාර වන්නේ ය. කුසලයට නොපමාව - අනලස්ව හැසිරෙන්න. ඒ අනුව නිසැකව ම - ජය ම හිමි කර ගන්න.

23.තෙ ඣායිනො සාතතිකා - නිච්චං දළ්හ පරක්කමා
ඵුසන්ති ධීරා නිබ්බානං - යොගකේඛමං අනුත්තරං

නැණැත්තෝ නිරතුරුව - දැහැන් වඩවා ගනිති. නිරතුරුව දැඩි සිතින්- වීරිය බල රැක ගනිති. එම නිසා කෙමෙන් හැම- බැමි වලින් නිදහස්ව- අනුත්තර වූ අමා -මහ නිවන් සුව ලබති.

හිතවතුනි, නැණැත්තෝ - මුළු දවස තිස්සේම - අකුසලයට ඉඩ නොදී- තුන් දොරම රැක ගනිති. එවිට දවසේ සියලු -දේ සඵල වන්නේය. සසල සිත නිසල වී- සැනසුම ලැබෙන්නේ ය.

24.උට්ඨානවතො සතිමතො - සුචිකම්මස්ස නිසම්මකාරිනො
සඤ්ඤතස්ස ච ධම්මජීවිනො - අප්පමත්තස්ස යසෝභිවඩ්ඪති

නොපිරිහුනු දිරිය ඇති- දැහැමි වූ තැනැත්තේ තුන් දොරම හසුරුවන- අප්‍රමාදී කෙනෙකි. ලෝකයේ පැතිර යන කිතු ගොසක් ඇති කෙනෙකි.

හිතවතුනි, තුන් දොරින් - සුසංවර තැනැත්තා- නිසැකවම පමා නැත. මහ විරිය ඇති කෙනෙකි. එබඳු වූ තැනැත්තෝ -ජය ම හිමි කර ගනිති. ලෝකයා ගරු කරන - උසස් තනතුරු ලබති.

මතු සම්බන්ධයි