කිත් පැසසුම් ලබන මඟ

රඹුක්කන
ධර්ම දූත මධ්‍යස්ථානයේ
පනාමුරේ සුමනනන්ද හිමි

සම්බුද්ධ දේශනාවට අනුව ලොව වසන්නාවූ සත්වයාට ලාභ, අලාභ මෙන්ම කීර්ති ,අපකීර්ති ද හිමි වේ. ඒ අටලෝ දහමට අනුවය. “ ලාභෝ අලාභෝ , අයසො, යසොච” යනුවෙන් දැක්වෙනුයේ එයයි.

සමස්ත ලොවටම සම්මතව ඇත්තේ එකම එක සඳක් පමණි. එම සඳ මේ ලොවම එකසේ ආලෝකවත් කරන්නේ ලොවින් කිසිදු ලාභයක් හෝ ප්‍රයෝජනයක් බලාපොරොත්තුවෙන් නොවේ. එමෙන්ම කිසදු අමනාපයකින් තොරව ඒ සඳ ආලෝකය සපයයි. එම ආලෝකයේ වින්දනය ලබන ඕනෑම සත්වයෙක් සඳට අවලාද කරන්නේ ද නොවේ. ආලෝකය ලබන සත්වයා සොඳුරු සඳට ප්‍රශංසා කරන්නේය.

අවංක ලෙස ප්‍රයෝජන ලාභ සත්කාර පිළිබඳ බලාපොරොත්තු රහිත සිතින් සේවය කරන ඕනෑම අයෙකු ලෝක සත්වයාගේ කීර්තියට නිතැතින් ලක් වන බව ඉන් ගම්‍ය වන්නකි.

එමෙන්ම ගෞරව කීර්ති ලැබීමට රඟ දැක්විය යුතු නොවේ. අවංක සිතින් තම කාර්ය භාර්ය නිසි ආකාරයෙන් ඉටු කිරීම ඊට ප්‍රමාණවත් වන බව පෙනේ. ආලෝකය දැකීමට අවශ්‍ය වූ විට පහනක් දැකීම පමණක් ප්‍රමාණවත් නොවේ.

එම පහන සැබෑවට දැල්විය යුතු වේ. එවිට අවශ්‍ය ආලෝකය ලැබේ. එසේ නම් පහනේ ආලෝකය ලැබීමට සැබෑ ගින්නෙන් දැල්විය යුතුවාසේ, ඔබට ලොව නමැති පහනින් ආලෝකය ලැබීමට නම් ඔබෙන් සමාජයට අවශ්‍ය කරන සැබෑම දෙය දිය යුතුවේ. එවිට සමාජය නමැති පහනින් ඔබට සැබෑම ආලෝකය ලැබේ.

ඔබේ කාර්ය නිසි ආකාරයෙන් ඉටුකරන්න. එවිට ඔබට අමුතුවෙන් ලාභ ප්‍රශංසා අපේක්ෂා කිරීමට අවශ්‍ය නොවේ.