ලොව වටා පින්කම් මාලාවක් බෙල්ලන්විල රජමහා විහාරයේ දී ඇරැඹේ

රාජ්‍ය සම්මාන දිනූ විද්‍යා ලේඛකයෙකු හා තාරකා විද්‍යාඥයෙකු වන අනුර සී. පෙරේරා මහතා විසින් මුළු ලොවේම ආශීර්වාදය තම මව්බිම කරා යොමුකර වීමටත්, එමෙන්ම තෙමසකට පෙර අභාවප්‍රාප්ත ආදරණීය බිරිය වූ චන්ද්‍රා (ඉන්දු) පෙරේරා මහත්මියට පින් පැමිණවීම පිණිසත්, ලෝකය පුරා රටවල් රැසක බෞද්ධ සිද්ධස්ථාන සියයකට පූජා කිරීම සඳහා සකස් කළ ‘දහම් පඬුරු’ සියයේ පළමුවැන්න ශ්‍රී ජයවර්ධනපුර විශ්වවිද්‍යාලයේ කුලපති, මහාචාර්ය බෙල්ලන්විල විමලරතන අනුනාහිමිපාණන් විසින් හිටපු විදේශ කටයුතු අමාත්‍ය රෝහිත බෝගොල්ලාගම මහතා වෙත භාරදුන් අවස්ථාවයි මේ. ශ්‍රී ලංකා ඉතිහාසයේ අමරණීය පිටුවක් පෙරලූ මෙම ඓතිහාසික පින්කම් මාලාවේ මංගල අවස්ථාවට වැල්ලවත්ත ‘විජයාරාමාධිපති’ විශ්වකීර්ති ශ්‍රී සාහිත්‍ය විශාරද, රාජකීය පණ්ඩිත, අහංගම ආනන්ද නා හිමියන් ඇතුළු මහා සංඝයා වහන්සේ රැසක් සහ සෞඛ්‍ය අමාත්‍යාංශයේ, ජාතික ඖෂධ අධිකාරියේ අධ්‍යක්‍ෂ වෛද්‍ය හේමන්ත බෙනරගම මහතා ද (වම් පසින්) සහභාගි වූහ. බෙල්ලන්විල රජමහා විහාරාධිකාරී මහාචාර්ය, බෙල්ලන්විල විමලරතන අනු නා හිමිපාණන් ගේ මූලිකත්වය යටතේ සිදු කෙරෙන මෙම පින්කම් මාලාවේ දී, තාරකා විද්‍යාඥ අනුර සී. පෙරේරා මහතා විසින් තම උපන් භූමියටත් එමෙන්ම, තම භාර්යාවටත් සෙත්පතා, ශ්‍රී ලංකාවේ සිද්ධස්ථාන 100 ක සහ ලොව වටා සිද්ධස්ථාන 100 ක ද මෙම අතිවිශේෂ පින්කම දියත් කර ඇත.