|
නවම් පුර පසළොස්වක 2021.02.26
ඩී. ආර්. විජයවර්ධන ශ්‍රීමතාණෝ
ඩී. ආර්. විජයවර්ධන ශ්‍රිමතාණන්ගේ 135 වැනි ජන්ම දිනය යෙදී තිබුණේ පසුගිය 23 වැනි
දාට ය. අධිරාජ්‍යවාදයෙන් පීඩිත ව සිටි මෙරට ජනතාවට නිදහස ලබා දීම සඳහා ගෙන ගිය
අරගලයේ දී පෑන අවියක් කොටගෙන නිහඬ සටනක් ගෙන යමින් ජාතිය අවදි කළ වීරවරයෙක් පමණක්
නොව, හෙළ බසට , හෙළ සංස්කෘතියට, සම්බුදු දහමට ආදරය කළ උතුම් මිනිසෙක් ලෙස එතුමන්ගේ
නාමය ලක් ඉතිහාසයට එක් වන්නේ ය .
මතු පරපුරට ද ආදර්ශයක් ලෙස කුඩා සටහනකින් හෝ එම මාහැඟි සේවය යම් තරමකට හෝ සිහිපත්
කොට කෘතඥතාව දැක්වීම අපගේ යුතුකම ය.
අවවාදයට වඩා ආදර්ශය උතුම් ය යන කියමන බෞද්ධයාගේ ජිවිතය හා බද්ධ වූවකි. ඩී . ආර්.
විජයවර්ධනයන්ට ද ළමා කාලයේ සිට මාහැඟි ආදර්ශයන් ලැබුණි . ඒ තම
පු‍ර්වාචාර්යවරුන්ගෙනි . තම මෑණීයන් සමඟ නිතර වෙහෙර විහාර ඇසුරු කළ විජයවර්ධනයන් ගේ
සිතෙහි ආගම දහම මෙන්ම රට , ජාතිය ගැනද හැඟීම් උපදින්නට විය .
හෙලේනා විජයවර්ධන ළමාතැනිය සැදැහැවත් උපාසිකාවකි.
ඇයගේ ආගමානුකූල දිවි පෙවෙත එම දරුවන්ට ආදර්ශයක් ම විය . තථාගතයන් වහන්සේගේ
පාදස්පර්ශයෙන් සුපුජිත වූ කැලණි විහාරයේ අභිවෘද්ධිය වෙනුවෙන් ඇය විසින් සිදු කරනු
ලැබු සේවය සුවිසල් ය . විහාර පරිශ්‍රය ප්‍රතිසංස්කරණය , නව විහාර මන්දිරයක්
ඉදිකරවීම , සොයිලියස් මැන්දිස් සුප්‍රකට චිත්‍ර ශිල්පියා ලවා කැලණි විහාරයේ චිත්‍ර
නිර්මාණය කරවීම , දුරුතු පෙරහර නැවත ආරම්භ කිරීම , විහාරයේ පිළිසකර කටයුතු සඳහා
කලාවැවේ අක්කර තුන්සිය ගණනක ඉඩමක් පූජා කිරීම ආදී මහා පින්කම් නිසා ම හෙලේනා
විජයවර්ධන මැතිනිය කැලණියේ විශාඛාව යන නාමයෙන් ද ගෞරවයට පාත්‍ර වූවා ය .
එවන් මවක ලද පුතු ද එම අඩිපාරේ ම යමින් හුණුපිටිය ගංගාරාමය , බම්බලපිටියේ වජිරාරාමය
, සේදවත්ත විහාරය වැනි විහාරස්ථානයන් හි ද භික්ෂුන් වහන්සේ ඇසුරු නිසරු කරන්නට විය
.
බ්‍රිතාන්‍ය අධිරාජ්‍යවාදීන්ට නතුව මෙරට ජනතාවට සිය ආගමික කටයුතු පවා නිදහසේ කරගෙන
යාමට අවස්ථාව අහිමි වීම තරුණ විජයවර්ධනයන්ට ඉවසුම් නොදෙන්නක් විය . ලේක්හවුස් මහා
පුවත්පත් ආයතනය ආරම්භ කොට අධිරාජ්‍ය විරෝධි සටනට මහා වේදිකාවක් සදන්නේ ඒ අනුව ය .
එම පුවත්පත් කර්මාන්තය තුළ සම්බුදු දහමට ද මුල් තැන ලැබුණි . විශේෂයෙන් දිනමිණ හා
සිළුමිණ පුවත්පත්වලින් සිදු වූ ධර්ම සන්නිවේදනය සුළු පටු නැත . ධර්මධර , විනයධර
වියත් භික්ෂූන් වහන්සේගේ ලිපි ලේඛනවලින් එකල ලේක්හවුස් පුවත්පත් පෝෂණය විය .
රත්මලානේ ධර්මාරාම හිමි , ලුණුපොකුණේ ශ්‍රී ධම්මානන්ද හිමි , පැලෑනේ ශ්‍රී වජිරඥාන
හිමි , තෙල්වත්තේ අමරවංශ හිමි , කරඳන ජිනරතන හිමි , වැලිවිටියේ සෝරත හිමි ඇතුළු
බොහෝ බුද්ධ පුත්‍රයන් වහන්සේලාට ලේක්හවුස් පුවත්පත් වලින් ඉමහත් ශාස්ත්‍රිය සේවයක්
සිදුකරන්නට හැකි විය .
පේරාදෙණිය විශ්ව විද්‍යාලය ආරම්භ කිරීමෙහිලා පුරෝගාමී වූ විජයවර්ධනයන් සම්බුදු
සසුනෙහි දියුණුව උදෙසා එහි භික්ෂු නේවාසිකාගාරයක් ද ස්ථාපිත කළේ ය . එයට වටිනා
පොතපත පරිත්‍යාග කළේ ය . භාෂාව ජාතියක අනන්‍යතාව පිළිබිඹු කරන කැඩපත ය . සිංහල
භාෂාවේ හා හෙළ සංස්කෘතියේ උන්නතිය වෙනුවෙන් ලේක්හවුස් පුවත්පත් මෙහෙයවන්නට
විජයවර්ධනයන් ගත් උත්සහය විශිෂ්ට ය .
එකල සිළුමිණ පුවත්පතට පැලෑනේ ශ්‍රී වජිරඥාන හිමියන් ඉදිරිපත් කළ ශබ්දාර්ථ චින්තා ,
මෙකල වරදවා ව්‍යවහාර කරන සමහර සිංහල ශබ්ද ආදි ලිපි, බස රැක ගැනීමෙහිලා කළ කාර්ය
භාරය වෙසෙස් ය . අදත් , ධර්ම සන්නිවේදනයෙහි ලා , භික්ෂූන් වහන්සේගේ ලේඛන ශක්තිය ඔප්
නංවා ගැනීමෙහිලා ලේක්හවුස් පුවත්පත් තෝතැන්නකි .
ධර්ම භාණ්ඩාගාරයක් බඳු , සාරධර්ම සංග්‍රහයක් වන බුදුසරණ පුවත්පත ඇරඹීමෙහිලා , වෙසක්
, පොසොන් පින්කම් , ආලෝක පුජා පින්කම්, සඳහා පෙළඹවීම් ඇති කරන්නේ ද විජයවර්ධන
ශ්‍රිමතාණන්ගේ ආකල්ප ය. එතුමා ඉතිහාසය බැබළවූවා සේ ම අනාගත පරපුර වෙනුවෙන් ඉතිරි කළ
සම්පත් බොහෝ ය. අප යුතුකම විය යුත්තේ එය රැක ගනිමින් පෝෂණය කිරීම ය. |
පසළොස්වක
අව
අටවක
අමාවක
පුර
අටවක
