මිහිපිට සුරලොව

සිරිමා බෝ රෝපණයෙන්
ආසිරි ගැන්වුණු සසිරු බිමයි
සිරිපා සිඹ එන සුසිනිඳු පවනින්
සිසිලස ලැබෙන බිමයි

දළදා සමිඳුගෙ සුදු මුදු කිරණින්
නැහැවී දිලෙන බිමයි
මුළු ලක් දෙරණම බුදු රැස් ගඟුලේ
ගිලී නිවී සැනැහෙයි

මහ සෑ මුල් කොට දා ගැබ් හැම ගම
අහසට නැඟී දිලේ
වැව් දිය රළ පෙළ කිරිපාටින් සෑ
සේයා අඳී ජලේ

ඝණ්ඨා නාදෙන් පිබිදෙන ගම්දන
රජ වී සිටි වෙලේ
පෙන්වා සවිබල රුපු සෙන් පරදා
ජය දද නැගී හෙළේ

නෙක නෙක පලතුරුවලින් පිරී ගිය
පලතුරු උයන වැනී
සහලින් පොහොසත් කරලින් බර වී
ගිය මහ කෙතක් වැනී

තුරු ලිය සෙවනේ දිය ඇලි ගංගා
පිරි මහ වනය වැනී
මීදුම් සිඹිනා කඳුවැටි පෙළිනා
දෙව්ලොව සිරිය ගනී

මා ඉපදුණු බිම සිරිලක් මව්බිම
මිහිපිට සුර ලොවකී
ලොව දිනූ දරුවන් රැසක් ජනිත කළ
උදාර මව් කෙනෙකි

සම්බුදු සමිඳුගෙ අගනා හැම දා
තැන්පත් කරඬුවකී
මේ රට සුරැකුම අප හැම සුගතිය
වෙත යවනා පිනකී

තලල්ලේ චන්දකිත්ති හිමි