ඉන්දියාවේ ප්‍රථම බෞද්ධ ප්‍රාන්තය ලඩක්

සම්බුදු සිරිතේ සුවිශේෂී සංසිද්ධීන්ගෙන් සුපෝෂිත වූ භාරතීය දේශය ලෝකවාසී බොදු දනන්ගේ නමස්කාර පූර්වක ගෞරවයට පාත්‍රවන පින් බිමකි. ඒ ගෞරවය තවත් අර්ථ ගන්වමින් ඉන්දීය රජය විසින් ඉන්දියාවේ ප්‍රථම බෞද්ධ ප්‍රාන්තය ලෙස නම් කරනු ලැබූ ‘ලඩක්’ බෞද්ධයා ලද සුවිශේෂී භාග්‍යයකි. සියයට හැත්තෑවක් පමණ බහුතර බෞද්ධ ජනතාවක් වෙසෙන ‘ලඩක්’ ප්‍රාන්තයේ ජනගහණය 274289ක් ලෙස සඳහන් කළ හැකි ය. එහි ලෙහ් නගැය විශාලතම නගරය ලෙස ප්‍රකට වන අතර ලෙහ් සහ කාර්ගිල් ප්‍රධාන නගර වේ. අති සුන්දර ‘ලඩක්’ ප්‍රාන්තය මුහුදු මට්ටමේ සිට අඩි 98,00ක උසකින් පිහිටා ඇති අතර එය මෙතෙක් පැවැතියේ ජම්මුකාශ්මීරයට අයත් ප්‍රදේශයක් ලෙසිනි. බෞද්ධ හා සංචාරක පිහිටීම් රැසක් මෙන් ම හිමාල කඳු තරණයට ද ප්‍රකට ලඩක් වර්ග කිලෝ මීටර 59196ක වපසරියකින් යුත්, අපූරු දේශගුණයකින් සමන්විත ය. හය මසක කාලයක් ගී‍්‍රස්ම ඍතුව ද තවත් හය මසක් සීත ඍතුව ද පවතින ‘ලඩක්’ සංචාරකයන්ගේ ආකර්ශනය දිනාගත් අපූර්වත්වයෙන් යුතු පුණ්‍ය භූමියකි.