බුදුසරණට 50 යි

බුදුසරණ හිටපු ප්‍රධාන කර්තෘ
කහතුඩුවේ පේ‍්‍රමසිරි අබේසිංහ

හැම මොහොතෙම වගේ අරගෙන බොදු පාට
ලැබගත් නිතෝරම ජනතාවගෙ පීට
ජුනි මාසයේ එන දහතුන් වැනි දාට
“බුදුසරණ”ට පනහ පිරේ එය සතුටකි ජනයාට

පෝයට පොසොන් එන පිරිසට කියවන්න
පත්තරයක් දෙමුයි කී අදහස දුන්න
රංජිත් විජයවර්ධන මැති අපි දන්න
කී අදහසින් විය “බුදුසරණක්” එන්න

පියසෙන් නිස්සංක මුල් කතුමැතිඳු වෙලා
මේ පත්තරෙන් රටටම සේවයක් කළා
දැන් ඇත එයට අඩ සිය වස සපිරි වෙලා
ඒ ගැන සතුටු වෙමු අප හැම එකතු වෙලා

කිසි ලාබයක් බුදුසරණින් නොගෙන එදා
ඇරඹු “බුදුසරණ” අපේ බොදුවනට බෙදා
ගත් අය නිසා මේ පත්තරෙ ඉවත නොදා
අවුරුදු පනහ ඇත පිරිලා දිනට මෙදා

සීසර් අපේ දැන් එහි කතුමැතිඳු විසින්
එය දියුණුවට ගෙන ආ බව කියමි තොසින්
දහ අට වසරක්ම කත්තුරු මැතිඳු ලෙසින්
සිටියෙමි මමත් එය පවසමි සරල බසින්

ජාතියෙ පහන් ටැඹ ලෙස හද එළි කරන
බොදුනගෙ යහපතට නිතරම වැඩ කරන
ලෝ සතහට ලබා දෙන්නට ගුණ බරණ
තව සිය වසක් වැජඹේවා’ බුදුසරණ