උඩුගම ශ්‍රී මහා බෝධි රාජ මහ පෙරහර
දර්ශනපති
උඩුගම මෝහාන් නන්දන නානායක්කාර
ඓතිහාසික උඩුගම ශ්‍රී මහා බෝධිරාජ මහා පෙරහර මේ මස 19 දින සවස 1.00ට
උඩුගම නගරයේ වීථි සංචාරය කෙරේ. ශ්‍රී සුගත තථාගත සම්මා සම්බුදුරජාණන්
වහන්සේගේ ජීවමාන කාලයේ පමණක් නොව දස පෙරුම්දම් පිරූ බෝධිසත්ව සමයේද
දිව්‍ය, මනුෂ්‍ය බ්‍රහ්මාදීන්ගේ අනේකවිධ මහාර්ඝ පූජාමය පරිහාරයෙන්
හෙවත් විචිත්‍ර පුද පෙරහරින් පුදනු ලැබූ ආකාරය වංශ කතාවන්හි හා බෞද්ධ
සාහිත්‍යයෙහි මැනවින් අන්තර්ගතය. මහින්දාගමනයෙන් පසු සඟමිත් තෙරණිය
විසින් ශ්‍රී මහා බෝධීන් වහන්සේගේ දක්‍ෂිණ ශාඛාව මෙරටට වැඩම කිරීමත්
සමඟ බුද්ධාභි වන්දන පූජෝත්සව සඳහා අසිරිමත් පෙරහර පැවැත්වීම අපට හුරු
විය.
1976 දී එවකට පැවති සිරිමා බණ්ඩාරනායක මැතිණියගේ රජයේ පූර්ණ
අනුග්‍රහයෙන් හා එවකට ඉන්දීය ජනරජයේ අග්‍රාමාත්‍යවරිය වූ ඉන්දිරා
ගාන්ධි මැතිණියගේත් ශ්‍රී ලංකා ජනාධිපතිවරයා වූ විලියම් ගොපල්ලව
මැතිඳුන්ගේ මූලිකත්වයෙන් ඉන්දීය මහා බෝධි සමාගමේ ප්‍රධාන සභාපතිවරයා වූ
භාරත දේශයේ ප්‍රධාන සංඝනායක නෙළුවේ ශ්‍රී ජිනරතන නාහිමිපාණන්ගේ
මැදිහත්වීමෙන් ලෝක සාම මහා සම්මේලනයේ ප්‍රධාන සභාපතිවරයා වූ සියම් මහා
නිකායේ මල්වතු මහා විහාර පාර්ශවයේ ගාලු පළාතේ ප්‍රධාන සංඝනායක නෙළුවේ
ශ්‍රී ගුණානන්ද නාහිමිපාණන් වහන්සේ ජය ශ්‍රී මහා බෝධීන් වහන්සේගේ
ශාඛාවක් ඉන්දියාවේ සිට පූර්ණ රාජ්‍ය ගෞරව සහිතව රතු පලස මතින් මෙරටට
වඩම කරවන ලදහ.
එවකට ගාල්ල මහ දිසාපති බ්‍රැඩ්මන් වීරකෝන් මහතාගේ සුරතින් මෙම බෝධි
ශාඛාව 1976 ඇසළ පොහෝදින උඩුගම ශ්‍රී ශාසනාලංකාරාරාම පුරාණ මහා විහාරයේ
රෝපණය කෙරිණි. ඊට උපහාර දක්වනු වස් නෙළුවේ ශ්‍රී ගුණානන්ද නාහිමිපාණෝ
1977 ජනවාරි 10 දින ඓතිහාසික උඩුගම බෝධිරාජ පෙරහර ආරම්භ කළහ.
ගා/උඩුගම ශ්‍රී ශාසනාලංකාරාරාමය වසර 110 කට අධික ඉතිහාසයකට නෑකම් කියන
ප්‍රදේශයේ ඉපැරණිතම විහාරස්ථානයයි. මෙහි ආදි කර්තෘවරයාණන් වන්නේ පනංගල
ශ්‍රී දේවරක්‍ඛිත මහා ස්වාමීන් වහන්සේ ය. ජනතාවගේ ගෞරවාදරයට පාත්‍ර වූ
මෙම පින්බිම බෝධිපූජාවන්ට ඉතා ජනපි‍්‍රය විහාරස්ථානයකි.
වත්මන් පාලක විහාරාධිපති උපාධි අපේක්‍ෂක උඩුගම සාරානන්ද හිමිපාණන්ගේ
අනුශාසනා පරිදි පවත්වන මෙම පෙරහරේ කටයුතු ආරම්භ කිරීමට නියමිතව ඇත්තේ
බෝධීන් වහන්සේ අබියස පැවැත්වෙන විශේෂ පූජාවකින් හා මංගල හස්තිරාජයා මත
සධාතුක කරඬුව තැන්පත් කිරීමෙන් අනතුරුවය. අලි ඇතුන් 10 කට ආසන්න
සංඛ්‍යාවක් ද, උඩරට – පහතරට හා සබරගමු නර්තනාංග ඇතුළුව මෙවර පෙරහරට
සම්බන්ධවන බව පෙරහර කමිටුවේ ප්‍රධාන ලේකම් ඒ.එල්.ජී. ජයසිරි මහතා
පැවසීය.
|
පුර
අටවක
පසෙලාස්වක
අව
අටවක
අමාවක