සම්බුදු සසුන ඒකාලෝක කළ තංගල්ලේ අනුරුද්ධ හිමිපාණෝ
දර්ශනපති
කනංකේ විජිතනන්ද හිමි
හික්කඩුවේ දකුණ ශාසනාරක්ෂක බල මණ්ඩලයෙහි හිටපු ලේ්ඛකාධිකාරි අමරපුර කල්‍යාණවංශ මහා
නිකායේ මහා ලේඛකාධිකාරි ශාස්ත්‍රපති පණ්ඩිත තංගල්ලේ අනුුරුද්ධ මාහිමිපාණන් වහන්සේ
යනු සසුන’ඹර ආලෝකයට පත් කළ මහා යතිවරයෙකි. උන්වහන්සේ අපවත් වී මෙම මස 21 වැනි දිනට
පුරා වසරක් සපිරේ.
 ඓතිහාසික දකුණු පළාතේ ගිරුවාපත්තුවට අයත් රිදියගම, පුංචිහේනයායගම නම් සුන්දර ගම්
පියසේ දී මෙරෙන්චි ගලප්පත්තිගේ විමලසේන හා ඩබ්. එස්.ජී. කරුණාවතී යන පින්වත් මවුපිය
දෙපළට දාව 1973 ජූලි මස 27 වැනි දින මෙලොව එළිය දුටු මෙම කුල කුමරුවන්ගේ නාමය වූයේ
මෙරෙන්චි ගලප්පත්තිගේ සමන්තලාල් ය.
මූලික අධ්‍යාපනය සඳහා ඇතුළත් වූයේ පළතුඩුව ප්‍රාථමික විද්‍යාලයටය. එලෙස අධ්‍යාපනය
ලබන කාලය අතරතුර ඉතා දක්ෂයකු ව හෙතෙම දොළොස් වැනි වියට පා තැබීමෙන් අනතුරුව පැවිදි
වීමේ බලවත් ආශාවෙන් පසුවිය. පෙර පුණ්‍යකෘත බල මහිමය නිසාම මවුපිය සහෝදර ඥාතීන්ගේ
ආශීර්වාදය මැද තම ඥාතී ස්වාමීන් වහන්සේ නමක් වූ රිදියගම සද්ධාලංකාර නාහිමියන්ගේ
මඟපෙන්වීම යටතේ එවකට පිටිවැල්ල ශ්‍රී ජයවර්ධනාරාමාධිපති ව වැඩ විසූ අධිකරණ සංඝනායක
විචිත්‍ර ධර්ම කථික ගිංතොට අනෝමදස්සී නාහිමියන්ගේ ශිෂ්‍යවරයකු වශයෙන් 1986
නොවැම්බර් මස 9 වැනි දින අම්බලන්ගොඩ, පොල්වත්ත ශ්‍රී අග්ගාරාම මහා විහාරයේ දී
පැවිදි දිවියට ඇතුළත් වූයේ තංගල්ලේ අනුරුද්ධ යන ශාසනික නාමයෙනි. තම ගුරු දේවයන්
වහන්සේගේ පූර්ණ අවවාද අනුශාසනා පරිදි මූලික පිරිවෙන් අධ්‍යාපනය වෙනුවෙන් අනුරුද්ධ
සාමණේරයන් වහන්සේ ඇතුළත් වූයේ රන්දොඹේ ශිෂ්‍යාලංකාර පිරිවෙනටයි.
එහි වැඩ විසූ කොස්ගොඩ පඤ්ඤාසීහ. කොස්ගොඩ ජිනාලංකාර, කොස්ගොඩ සුභූති ආදී ශ්‍රේෂ්ට
උගත් යතිවරයන් වහන්සේ ඇසුරින් අධ්‍යාපනය හැදෑරූ අනුරුද්ධ හිමියන් ලිවීමේ, බිනීමේ
මහත් දක්ෂයෙක් විය.
මෙලෙස මූලික ධර්ම ශාස්ත්‍රෝද් ග්‍රහණයෙන් අනතුරුව උගත යුතු බණ දහම් මනාව හදාරා 1995
ජුනි මස 10 වැනි දින අමරපුර කල්‍යාණවංශ නිකායේ මූලස්ථානය වූ දොඩන්දූව ශ්‍රී
ශෛලබිම්බාරාම මහා විහාරස්ථ උදකුක්ඛේප සීමාවේ දී අධිශීල සංඛ්‍යාත උපසම්පදාවට පත්
වූහ. මෙලෙස උපසපන් වීමෙන් පසු බොහෝ ජාතික, ශාසනික යුග මෙහෙවරක නිරත වූ උන්වහන්සේ
උසස් අධ්‍යාපන කටයුතු ද මැනවින් සිදු කරන ලදි. එහි ප්‍රතිඵලයක් වශයෙන් 2005 වර්ෂයේ
දී කැලණි විශ්වවිද්‍යාලය මඟින් ශාස්ත්‍රවේදී උපාධිය ලබා ගත්හ. පසුව 2007 වසරේ දි
ශ්‍රී ලංකා බෞද්ධ හා පාලි
විශ්වවිද්‍යාලයීය පශ්චාත් උපාධි ආයතනය මඟින් ශාස්ත්‍රපති උපාධිය ලැබූහ.
තම ගුරු දේවයන් වහන්සේ වූ ගිංතොට අනෝමදස්සි නාහිමියන් බලවත් ලෙස වයෝවෘද්ධ වීමෙන්
පසුව දැඩි සේ ගිලන් විය. එකී කාලය තුළ ස්වකීය විහාරස්ථානය වන පිටිවැල්ල ශ්‍රී
ජයවර්ධනාරාම පින්බිමට වැඩම කළ අනුරුද්ධ හිමියන් නිරතුරුවම තම ගුරු දේවයන් වහන්සේට
සිදු කළ යුතු සියලු ඇප උපස්ථාන සිදු කරනු ලැබුවේ මහත් ගෞරවයෙන් හා ගුරු භක්තියෙනි.
හික්කඩුව දකුණ ශාසනාරක්ෂක බල මණ්ඩලයෙහි ලේඛකාධිකාර ධුරය සඳහා අවස්ථා කිහිපයකම තේරී
පත් වූ උන්වහන්සේ කිසිදු විටෙක ලාභ සත්කාර අපේක්ෂා නොකොට සුවිශාල සේවාවක නිරත වූයේ
තම ධනය ද නිර්ලෝභීව වැය කරමිනි. එපමණක් නොව ප්‍රදේශයෙහි යම් යම් ගැටලු ඇතිවූ
අවස්ථාවන්හි දී අනුරුද්ධ හිමියන් ඒවා නිරාකරණය කිරීම සඳහා මූලිකත්වය ගනු ලැබූ
අවස්ථා බොහෝය. කිසිදු විටෙක අසාධාරණයට හිස නොනැමූ උන්වහන්සේ කිව යුත්ත කිව යුතු තැන
නිර්භයව ප්‍රකාශ කළ මහා යතිවරයෙකි. පිරිසුදු හදවතකින් හෙබි මුන්වහන්සේ හැම විටම
යුක්තිය වෙනුවෙන්ම ක්‍රියා කළ වග හැමදෙනා දන්නා සාධකයකි. නිර්ලෝභි චේතනාවෙන්
ක්‍රියා කළ අතර උන්වහන්සේ සෑම වසරකම තම ගුරු දේවයන් වහන්සේ සිහි කරමින් පෙබරවාරි
මාසය තුළ මහා දානමය පින්කම් සිදු කරනු ලබන්නේ ද එකී කෘතවේදී බව නිසාවෙනි.
පැවිදි දිවියෙහි අනුගමනය කළ යුතු පිළිවෙත් මෙන්ම තම ශාසනික සම්ප්‍රදායන්ට ද
උන්වහන්සේ නිතර ගරු කරමින් අනුගමනය කළ බව අප හොඳින් දන්නා කරුණකි. එහි ප්‍රතිඵලයක්
වශයෙන් අමරපුර කල්‍යාණවංශ මහා නිකායේ කැපී පෙනෙන තරුණ සංඝ යතිවරයෙක් ලෙස ක්‍රියා කළ
උන්වහන්සේ 2021 වර්ෂයෙහි ස්වකීය නිකාය පාර්ශ්වයෙහි විධායක හා මහා ලේඛකාධිකාරි
ධුරයන්ට පවා පත්වීමට තරම් භාග්‍යසම්පන්න විය.
එලෙස මහත් සේවාවක් උදෙසා නිරතුරුවම තම කාලය, ශ්‍රමය මෙන්ම තම ධනය ද කැප කළ අනුරුද්ධ
හිමියන් ශාසනික වශයෙන් ඇති වන යම් යම් අර්බුද හමුවේ නොබියව ක්‍රියා කළ මහා තෙරනමකි.
2021 අග භාගයේ දී ශී‍්‍ර ලංකා ධර්මදූත මහ පිරිවෙනේ පරිවේණාධිපති ධුරයට පත්වූ
උන්වහන්සේ අධ්‍යාපනික වශයෙන් සිදු කළ මෙහෙවර අතිවිශිෂ්ටය. ධර්මදූතයන් වහන්සේ නමක්
ලෙස ද ඉන්දියාව, තායිලන්තය, මැලේසියාව, සිංගප්පූරුව හා වියට්නාමය ආදී රටවලට වැඩම කළ
මෙම මහා යතිවරයන් වහන්සේ තම කාලය නිරතුරුවම කැප කරනු ලැබුවේ සමාජ යහපත වෙනුවෙනි.
වෙහෙස මහන්සිය කිසිම විටෙක නොතැකූ හෙතෙම කළ යුතු සියලු යුතුකම් ඉතා මැනවින් ඉටු කළ
ආදර්ශවත් තරුණ හිමිනමකි. උන්වහන්සේ නිරතුරුවම ප්‍රකාශ කළ වදනක් විය. එනම් “ලෙඩ ගැන
සොයන්න මට වෙලාවක් නැත. මට වුවමනා වැඩ පමණි” යන මෙම ආදර්ශය මඟින්ම අනුරුද්ධ හිමියන්
යනු කොතරම් පරාර්ථකාමී චරිතයක්ද යන්න කදිමට පැහැදිලි වනු ඇත. වරින් වර තමන් වහන්සේට
ඇති වූ අසනීපයන්ට නිසි සේ ප්‍රතිකාර නොගත් උන්වහන්සේ සමාජ, ශාසනික ක්‍රියා
වෙනුවෙන්ම තම දිවිය කප කළහ. 2023 වසරෙහි වස්සාන සමය තුළ ධර්ම දේශනාවක් සිදු කරන
අතරතුර අසනීප වූ උන්වහන්සේ බොහෝ දෙනාගේ දැඩි කැපවීම හමුවේ ජීවිත අවදානමෙන් මිදී
ගිලන් බවට පත් වූහ.
එලෙස ගිලන් බවට පත්වීමෙන් පසුව ද දේශීය හා බටහිර ප්‍රතිකාර බොහෝමයක් ලබා දෙමින්
උන්වහන්සේ ප්‍රකෘතිමත් තත්ත්වයට පත්කර ගැනීමට ගිිහි පැවිදි බොහෝ දෙනා සුවිශාල
උත්සාහයක නිරත වූහ. ස්වකීය විහාරස්ථානයට වැඩම කොට වෛද්‍ය ප්‍රතිකාර හා උපස්ථාන මනාව
ලබමින් යම් සුවතාවකට පත්වෙමින් පැවති කාලයක නිරතුරුවම උන්වහන්සේ මනා සිහි
බුද්ධියෙන් ක්‍රියා කරන්නට වූහ. එකී කාල සමයෙහි පවා තමන් සිදු කළ උදාර සේවාව
නිරතුරුවම සිහිකළ අනුරුද්ධ හිමියන් ඒ තුළින් ලැබූ ආත්ම තෘප්තිය බොහෝ ය. කෙසේ නමුත්
2024 නොවැම්බර් මස 21 වැනි දින උන්වහන්සේ අපවත් වූයේ කිසිවකු නොසිතු අයුරිනි.
හදිසියේ ඇතිවූ හෘදයාබාධයක් නිසා අපවත් වූ මෙම තරුණ යතිවරයන් වහන්සේ වචනයේ පරිසමාප්ත
අර්ථයෙන් ම පරාර්ථය වෙනුවෙන්ම කැප වූ ආදර්ශවත් බුද්ධ පුත්‍රයෙකි. උන්වහන්සේගේ අභීත
හඬ, ඍජු ප්‍රතිපත්ති අදටත් බොහෝ දෙනාට මතක ය.
කෙසේ නමුත් අප සසරින් ගෙනෙන ලද කර්ම ශක්තිය අනුව අපේ තංගල්ලේ අනුරුද්ධ ස්වාමීන්
වහන්සේට ද නොසිතූ අයුරින් අකාලයේ ජීවන ගමන නතර කොට මරණ ධර්මතාවට පත් වීමට සිදු වූහ.
ඒ කෙසේ වුව ද උන්වහන්සේගේ ගුණ සුවඳ කිසිදා මැකී නොයන තරමට ම නිරහංකාර, නිර්ලෝභී,
අවංක, පිරිසුදු හදවතකින් යුත් මහා යතිවරයෙක් ලෙස අවිවාදයෙන් හැඳින්වීමට හැකි බොහෝ
ගුණ සතුව තිබූ, මෙම ආදර්ශවත් බුද්ධ පුත්‍රයන් වහන්සේ අපගෙන් වෙන්ව ගොස් මෙම
නොවැම්බර් මස 21 වැනි දිනට පුරා වසරක් සපිරේ.
සමාජයෙහි බොහෝ අකෘතඥ මිනිසුන් අතර සුන්දර මිනිසත් බවින් සොබමන් වූ උන්වහන්සේ බුද්ධ
දේශනාවට අනුකූලවම මහා පරාර්ථකාමී ආදර්ශවත් බුද්ධ පුත්‍රයෙකි. සසුන’ඹර එළිය කරමින්
අකාලයේ අපවත් වුවත් වසර සිය ගණනක නොමැකෙන ජාතික, ආගමික හා අධ්‍යාපනික සේවයක
නිරතුරුවම යෙදුණු අපේ තංගල්ලේ අනුරුද්ධ මාහිමිපාණන් වහන්සේට සසර දුකින් එතෙරව ලබන
උතුම් අමාමහ නිවන් සුවය ම අත්වේවා’යි පතනෙමු. |
පුර
අටවක
පසළොස්වක
අව
අටවක
අමාවක
