නිහතමානී ගුණ සුපූජිත බ්‍රාහ්මණගම
මුදිත නාහිමිපාණෝ
කොළඹ දිස්ත්‍රික්කයේ හෝමාගම ප්‍රදේශයේ බ්‍රාහ්මණගම නම් ග්‍රාමවරයේ දී එච්.එම්.
පෙරේරා සහ ඇග්නස් පෙරේරා යන පින්වත් මවුපියන්ට දාව 1952 ඔක්තෝබර් මස 15 වැනි දින,
අපගේ ගරු ගුරු දේවෝත්තමයන් වහන්සේ වන බ්‍රාහ්මණගම මුදිත නාහිමියෝ ජන්මලාභය ලැබූහ.
 දහර අවධියේ දී උන්වහන්සේ ස්වකීය ගම්පියසේ පාසලෙන් පළමු අධ්‍යාපනය ලබා, මවුපියන්ගේ
සැදැහැවත් අභිලාෂය මත 1970 ජනවාරි 22 දින මාවිත්තර ශ්‍රී ආරියවංශාභිධාන නාහිමිපාණන්
වහන්සේ හා පරගස්තොට පියරතන නාහිමිපාණන් වහන්සේගේ ආචාර්යෝපාධ්‍යායත්වයෙන්
ප්‍රවෘජ්‍යා භූමියට ඇතුළත් වූහ. පසුව මහරගම ශ්‍රී වජිරඤාණ භික්ෂු මධ්‍යස්ථානයේ
අධ්‍යාපනය ලබමින් අග්ගමහා පණ්ඩිත මඩිහේ පඤ්ඤාසීහ මහා නාහිමිපාණන් වහන්සේගේ හා
අම්පිටියේ ශ්‍රී රාහුල නාහිමිපාණන් වහන්සේගේ මඟපෙන්වීම යටතේ ධර්ම
ශාස්ත්‍රෝද්ග්‍රහණය විශිෂ්ට ව සිදු කළහ.
එම අධ්‍යාපන ගමන තුළ උන්වහන්සේ රාජකීය පණ්ඩිත උපාධිය සම්පූර්ණ කිරීමෙන් අනතුරුව,
එකී භික්ෂු අධ්‍යාපන ආයතනයෙහි ම ධර්මාචාර්යවරයකු ලෙස ධර්ම ශාස්ත්‍රීය සේවය ආරම්භ
කළහ. පේරාදෙණිය විශ්වවිද්‍යාලයෙන් ගෞරව ශාස්ත්‍රවේදී උපාධියත්, පශ්චාත් උපාධි
ආයතනයෙන් ශාස්ත්‍රපති උපාධියත් ලබා උන්වහන්සේ ශාස්ත්‍රඥ භික්ෂුවක ලෙස ප්‍රදේශයේ
සම්භාවනාවට පාත්‍ර විය.
 උන්වහන්සේගේ ඒකායන පරමාර්ථය වූයේ බුදුදහමේ පණිවිඩය ලෝකය පුරා ව්‍යාප්ත කිරීමයි. ඒ
අනුව 1992දී අමෙරිකාවේ මිසසාගා ප්‍රදේශයේ වෙස්ටර්න් බෞද්ධ විහාරය ඉදිකිරීමෙන් ධර්ම
දූත සේවය ආරම්භ කළ උන්වහන්සේ, පසුව 1999 දී ලොස් ඇන්ජලීස් බෞද්ධ විහාරය ස්ථාපිත
කළහ. එහිදී උන්වහන්සේ විවිධ ජාතිකයන්ට ධර්ම දේශනා කරමින්, බුදුදහම ජාති, භාෂා සීමා
නොතකා සත්‍යයක් බව ස්වකීය ජීවිතානුසාරයෙන් ම උගැන්වීය.
අමෙරිකාව හා කැනඩාව ඇතුළු රටවල දහම් පාසල් ආරම්භ කරමින්, ජාත්‍යන්තර බෞද්ධ ප්‍රජාවට
දහම් අධ්‍යාපනය ලබා දීම උන්වහන්සේගේ සුවිශේෂ සේවාවකි. ඉන්පසු අමෙරිකාවේ මිචිගන්
ප්‍රදේශයේ ග්‍රේට් ලේක්ස් බෞද්ධ විහාරය හා කැනඩාවේ ඔටාවාවේ හිල්ඩා ජයවර්ධනාරාමය යන
විහාරස්ථානවල විහාරාධිපතීන් වහන්සේ ලෙස ශාසනික සේවය ඉටු කරමින්, විදේශයන්හි ධර්ම
ප්‍රචාරයට මහාර්ඝ දායකත්වයක් ලබා දුන්හ.
ඒ අතරතුර, උන්වහන්සේ බොහෝ විදෙස් විශ්වවිද්‍යාලවල හා ආයතනවල දී ධර්ම දේශනා කිරීමට
හා ශාස්ත්‍රීය සාකච්ඡා සභාවලට සහභාගී වීමට තරම් භාග්‍යවන්ත වූහ. ඉතා නිහතමානී,
ගෞරවනීය හා පරමාර්ථකාමී ස්වභාවයෙන් යුතු ව උන්වහන්සේ විසින් සිදු කරනු ලැබූ
දේශනාවන් බොහෝ විදේශිකයන්ගේ සිත් තුළ බුදුදහම පිළිබඳ නව ආලෝකයක් ඇති කරනු ලැබිණි.
දෙදහස් දහ අට වසරේ වප් මාසයේ දී කෝට්ටේ ශ්‍රී කල්‍යාණි සාමගී‍්‍ර ධර්ම මහා සංඝ
සභාවේ මහානායක ධුරන්ධර අති පූජ්‍ය ඉත්තෑපානේ ධම්මාලංකාරාභිධාන මහ නාහිමිපාණන්
වහන්සේගේ හා විංශත්වර්ගික කාරක මහා සංඝ සභාවේ ඒකච්ඡන්දයෙන් උන්වහන්සේට කැනඩාවේ
ප්‍රධාන සංඝනායක පදවිය පිරිනමන ලදී. ඒ මඟින් උන්වහන්සේ ශ්‍රී සම්බුද්ධ ශාසනයේ
උන්නතිය වෙනුවෙන් සිදුකරනු ලැබූ මහාර්ඝ සේවය ඇගයීමට ලක්විය.
උන්වහන්සේගේ බෝධිසත්ව ගුණය නිසා ම ඕනෑම තත්ත්වයක සිටින පුද්ගලයකුට උචිත ලෙස ධර්මය
උගැන්වීම, අනුශාසනා කිරීම සහ මඟපෙන්වීම, දායකකාරකාදීන්ගේ හිතසුව පිණිස ආධ්‍යාත්මික
වර්ධනය උදෙසා උන්වහන්සේ සිදුකරන සේවාව සිහිපත් කරනුයේ කෘතඥතා පූර්වක ව ය. මෙරට
පමණක් නොව, විදෙස් රටවල ද උන්වහන්සේගේ ධර්ම කර්තව්‍යය පිළිබඳ ප්‍රජාව අතර ඇත්තේ
නොමඳ ප්‍රසාදයකි.
දකින්නාගේ සිත ප්‍රසන්න වන අයුරින් අර්ථයෙන්, ධර්මයෙන් සහ සුහදත්වයෙන් මඟ පෙන්වන
උන්වහන්සේ දෙස් විදෙස් ගිහි පැවිදි බොහෝ දෙනා ගෞරවයෙන් නමස්කාර කරන සංඝ නේතෘවරයෙකි.
බ්‍රාහ්මණගම මුදිත නාහිමිපාණන් වහන්සේගේ පින්බර ජන්ම දිනය යෙදී තිබෙන මෙම 15 දින
සිහිපත් කරමින් නාහිමිපාණන් වහන්සේගේ ශිෂ්‍ය ආයුෂ්මතුන් වහන්සේ සහ ශ්‍රී ලාංකික
බෞද්ධ ජනතාව, විදෙස් දායක පිරිස ඇතුළු සියලු ම සැදැහැති හුදී ජනයාගේ පැතුම වන්නේ,
උන්වහන්සේ දීර්ඝායුෂ සම්ප්‍රයුක්ත ව චිරාත් කාලයක් ධර්ම ශාස්ත්‍රීය සේවාවන්
සිදුකරමින් යෙහෙන් වැඩ වෙසේවා යන්නයි.
තව උන්වහන්සේගේ ප්‍රඥාව හා පුරන්නාවූ ශ්‍රමණ ධර්මය මතුවටත් ලෝකයාට ආලෝකය දෙන උතුම්
පහන් ටැඹක් වේවා! යන්නයි.
සතවස්සා ච ආයු ච ජීවසිද්ධි භවන්තු තේ.......
අප ගුරුදේවෝත්තම නායක මාහිමිපාණන් වහන්සේට
සුපින්බර ජන්ම දිනයක් වේවා! |
