සැනසුම් පිළිවෙත

සිතන සිතිවිලි ලියන ලියවිලි
කියන මැසිවිලි අනන්තයි
සසර සරනා කෙනාහට මෙය
ඉතා බියකරු පිළිවෙතයි
යොමා යුග නෙත බලා දස අත
නොගෙන සිතිවිලි අභිතවත් ලෙස
විගස දහමට නැඹුරු වනුනට
විරිය වැඩුමට සම්පතයි
එයම නිවනට මඟ සදයි
එයම ජීවන මංපෙතේ
සදා සැනසුම් පිළිවෙතයි

කල්ප සුවහස් කල්ප ගණනේ
පෙරුම් දම් පිරු සමිඳුගේ
නිමල දහමේ වෙළී පැටලී
නියුතු වීමෙන් ලැබෙයි සැනසුම
සදා සැනසුම ලබා ගන්නට
අනගි මාවත එය තමයි

දිනපතා සිත පෙරටු ගන්වා
අරි අටැඟි මග සිත තබා
දිවා රැයෙහිම සියලු ලෝ සත
වෙතට සැනසුම සලසලා
යොමා සිතිවිලි සිතා යහපත
වඩමු වීරිය නිතිපතා
ජරා මරණය පිටු දකින්නට
සෙත් පතන මඟ පිළිවෙතයි
බිඳි බිඳී යන මේ කයේ

ජරා මරණය පිටු දකින්නට
දහම ඔසුවකි මුනිඳුගේ
නිවී සැනසෙන නිවන අප හැම
පතමු නිති වී සැනසුමේ

දහම අටලෝ වෙතින් කම්පා
නොවී සැනසුම ළඟා කරගෙන
සදා යහපත්
සියලු සිතිවිලි
ලියන ලියවිලි
කියන කියවිලි
බුදු මගෙහි නියැළෙමින් ලැබ ගමු

උපේක්ඛාවෙන් නිවී නිතරම
බ්‍රහ්ම විහරණ වඩාලා
සදා සැනසුම ලබා ගන්නට
නිවන පෙරටුව දහමේ නියැළී
සැමට සුවසෙත ලබා දී
අපිත් ළං වෙමු
නිවන් දොර වෙත
සදා ඉපදෙන
මියෙන ලෝකෙන් නික්මිලා

අමා මෑණි මුනිඳු වදහළ
සතර සතිපට්ඨාන පිළිවෙත
නිතර වැඩුමට අවසරයි
නිවි නිවී සැනසුම ලබන්නට
එයම පෙරමුණු වන වගයි
නිදන නොනිදන යනෙන හැමවිට
වැඩිය යුතු දම් පිරිවෙනයි
සදා සැනසුම
සිතේ එකඟය
එයම අප හට සම්පතයි

සුමිත්‍රා පරුස්සැල්ල
ඊරියගොල්ල, දෙහිඕවිට