ඇසළ පෝය වර්ණනාව
වෙස්සන්තර බවෙන් වෙන් වී මිනිසකු සේ
තුසිතයෙ විඳි සැපත කවියෙන් කියනු කෙසේ
පස්මහ බැලුම් බල බල පොහො දිනක මෙසේ
පිළිසිඳ ගැනුනි මහමායා මවගෙ කුසේ
එක් විය දරු බැඳීමක් මට අතිරේක
එය කරුණක්ය දදිවියට ගෙනදෙන ශෝක
අතහැර ගිහි දිවිය දුක තැවරෙන නේක
අභිනිෂ්ක්‍රමණයත් විය අද වැනි දාක
අවබෝධය ලැබුව සදහම් රස මුසුවේ
පස්වග මහණුන්ට පළමුව අඬ ගැසුවේ
ඒ පස්දෙනා දම්රස විඳ විඳ පසුවේ
දම්සක් සුතුර අද වැනි දිනකය දෙසුවේ
වටහා ගන්න කීවත් තම තමා වහා
මිසදිටුනට නොතේරේ මෙය තමා රහා
මානය බිඳිනු වස් බුදු හිමි අමා මහා
පෙළහර පෑව බව පැවසෙයි යමා මහා
වාද්දුව
සිරිමහ මිහිදු පිරිවනේ
වේලිඔය සිරි වජිර හිමි |
