සිරිපා පුද බිම

සාළොස් මහ පුද බිමින් දිදුලන ලක් මවගෙ රූ සිරි මනා
මුහුල විලසින් නමින් සමනළ සිරස නිති එහි බැබළෙනා
සමන් සුරිඳුන් වෙතින් ඇරයුම් ලදින් අප මුණි වඩිමිනා
බඹ සුරන් පුද උතුම් සිරිපා කමල එහි තබමිනා

පා කමල් තැබු තැන් පටන් සිරිලක් දනන් එහි පැමිණෙනා
නෙක් පිදුම් කරමින් තමන් හිස් බැති සිතින් එහි තබමිනා
හිරු රදුන් නිතැතින් ම උදැහැන සිඳු තුළින් විත් නමදිනා
සමන් දෙවිඳුන් බැතින් අදරින් උතුම් පුදබිම රකිමිනා

නෙක් දනන් බැතියෙන් රැගෙන යන මලින් සුවඳින් පුද දෙනා
තමන් පැතුමන් ඉටුවෙමින් සැප සතුට ලැබුමට පතමිනා
මුල් ගමන් යන කෝඩුකරුවන් නවමු පිළිවෙත් කරමිනා
මෙවන් පුදබිම් ලොවෙහි දුලබය ගිරි මුදුන්වල වැජඹෙනා

නන් සමය ගත් නමුදු මෙහි එන බැතිමතුන් උන් අදහනා
දෙවිවරුන් පුද ලැබූ බිම් යැයි නෙක මතයන් පවතිනා
මෙකරුනින් මෙය හැම දනන්ගෙ ම පුද බිමක් ලෙස පවතිනා
ලකෙහි පමණක් නොවේ මුළු ලොව මෙවැනි පුද බිම් හිඟවෙනා

උඩුහාවර දේවානන්ද හිමි
ගොංගිතොට වත්තල