සේරුවාවිල ලලාට ධාතු නිකිණි මහා පින්කම සහ මහ නා හිමි ගුණ සමරුව

තිලෝගුරු අමාමෑණි සම්මා සම්බුදුරජාණන් වහන්සේගේ සිරිපා පහසින් සදහටම පවිත්‍ර වූ උන් වහන්සේගේ ශ්‍රීමත් ලලාට ධාතුන් වහන්සේ නිදන්ගත සේරුවාවිල (තිස්ස මහා වෙහෙර ) මහ සෑ රදුන් අබියස 86 වන වරටත් පැවැත්වෙන ලලාට ධාතු පූජා නිකිණි මහා පින්කම අගෝස්තු මස 16 වන දින සිට 25 වන දින දක්වා පැවැත්වීමට නියමිතව ඇත.

මෙවර පින්කමේ විශේෂත්වය වන්නේ ගව ඝාතනය තහනම් කරන ලෙස රජයට බලකිරීමේ සත්‍ය ක්‍රියාවයි. 16 වන දින ලක්දිව විසිරී සිටින සත්ව අවිහිංසාවාදි සමිතිවල සාමාජික සාමාජිකාවන් රැස්වී 25 වන දා පහන් වන තෙක් රත්නත්‍රයාභිවාදන මාලා බන්ධන ගාථා සජ්ඣායනා කරමින් සත්‍යක්‍රියා කරනවා ඇත. 16 දින සිට 23 දක්වා - අටවිසි බුද්ධ වන්දනා හා ලලාට ධාතු වන්දනා පෙරහර හා පූජාවන් පැවැත්වේ. 21 දින - සත්වරු පිරිත් දේශනය ආරම්භයද 22 දින දවල් 100 නමකට අධික මහ සඟරුවන විෂයෙහි පිරිනැමෙන සපිරිකර සංඝගත දක්ෂිණාවද 24 දින - පෙරවරු 6 .00 සිට 25 දින පෙරවරු 6.00 දක්වා පෝදා භවනා වැඩසටහන ද පැවැත්වේ. (මෙම වැඩසටහන් සියල්ල ශ්‍රී ලංකා ගුවන් විදුලි සංස්ථාවේ ස්වදේශීය සේවය මගින් සජීවීව විසුරුවා හරිනු ලැබේ) 24 දින - රාත්‍රී 9.30 සිට පසුදා පහන් වන තුරු සත් වරු පිරිත් දේශනාවේ මහා පිරිත්, දොරකඩ අස්න හා අනුශාසනා දේශනාවද 24 දින - රාත්‍රී ලලාට ධාතු පූජා මහා පෙරහර විදී සංචාරය ද 25 දින - 50 නමක් විෂයෙහි සගසතු මහා දානය ද පැවැත්වීමට විහාරාධිපති සේරුවාවිල සරණකිත්ති නාහිමියන්ගේ අනුශාසනා පරිදි කටයුතු යොදා ඇත.