සංඝරාජ පෙරහර ඇසළ පෝදා

වැලිවිට අසරණ සරණ සරණංකර සංඝරාජ මාහිමි අනුස්මරණය කරමින් මල්වතු මහා විහාරයීය සංඝරාජගුණානුස්මරණ සමිතිය මඟින් වාර්ෂිකව පවත්වාගෙන එනු ලබන සංඝරාජ මාහිමිගේ ප්‍රතිමාව වැඩමවාගත් සංඝරාජ මහ පෙරහර ඇසළ පුර පසළොස්වක පෝය දින අත්‍යාලංකාරයෙන් පැවැත්වීමට මහෝපාධ්‍යාය අලුත්ගම ධම්මානන්ද නාහිමියන්ගේ අනුශාසකත්වයෙන් යුත් සංඝරාජ ගුණානුස්මරණ සමිතිය විධි විධාන යොදා ඇත.

මල්වතු මහා විහාර පාර්ශ්වයේ මහානායක තිබ්බටුවාවේ ශ්‍රී සිද්ධාර්ථ සුමංගල මහ නාහිමියන්ගේ ආසිරි වාදයෙන් පැවැත්වෙන සංඝරාජ පෙරහර ආරම්භ කිරීමට පළමුව මල්වතු මහා විහාරයීය උපෝෂථාගාරය අබියසදී සංඝරාජ ගුණ සමරු උත්සවයක් ද පැවැත්වේ. සවස 02.30 ට මල්වතු මහා විහාරයෙන් පිටත්වන සංඝරාජ පෙරහර මහනුවර වීදි සංචාරය කර සවස මල්වතු මහා විහාරයෙන් ගෙවදී. මහනුවර බෞද්ධ සමිති නියෝජිතයින්ගේ ද සංඝරාජ ගුණානුස්මරණ සමිතියේ සහ සංඝරාජ දහම් පාසලේ හා දායක දායිකාවන්ගේ සහභාගීත්වයෙන් පෙරහර ආරම්භ කිරීමට පළමුව මධ්‍යම පළාත් ආණ්ඩුකාර ටිකිරි කොබ්බෑකඩුව, දියවඩන නිළමේ ප්‍රදීප් නිලංග දෑල යන මහත්වරු ප්‍රධාන ආරාධිත අමුත්තන් සංඝරාජ මාහිමි ප්‍රතිමාවට පුෂ්ප පූජෝපහාර දක්වනු ඇත.