සෙත් පැතීමේ නෙළුම් මල් පූජාව 25 දා

කොළඹ 07 බෞද්ධාලෝක මාවතේ අතුල දස්සන බෞද්ධ මධ්‍යස්ථානාධිපති බුද්ධ ශාසන කීර්ති ශ්‍රී සද්ධර්ම භාතාක ත්‍රිපිටකාචාර්ය ශ්‍රී සද්ධර්ම වාගීශ්වර ශ්‍රී සිද්ධාර්ථ මේධාලංකාර වංසාවතංස අමරපුර සිරි සද්ධම්මවංස නිකායේ සල්පිටි හේවාගම් දෙකෝරළයේ ප්‍රධාන සංඝනායක බොරැල්ලේ අතුල නාහිමියන්ගේ අනුශාසනා පරිදි ජනාධිපති මහින්ද රාජපක්‍ෂ මහතා ප්‍රධාන රජයටත් ත්‍රිවිධ හමුදා රණවිරුවන්ටත් ආශීර්වාද පතා ජූලි 25 වනදා පස්වරුවේ වාර්ෂික නෙළුම් මල් පූජාව කතරගම කිරි වෙහෙර අබියසදී පැවැත්වේ.

තරගම කිරිවෙහෙර රාජමහා විහාරාධිපති ඌව විශ්වවිද්‍යාලයේ කුලපති ආචාර්ය අලුත්වැව සෝරත නාහිමියන්ගේ ද අනුග්‍රහයෙන් එම පින්කම සිදු කැරේ.

බොරැල්ලේ අතුල නාහිමියන්ගේ පැවිදි දිවියේ වස් 25 ක් සපිරීමද වාර්ෂික නෙළුම් මල් පූජාවේ 25 වන වර්ෂය සපිරීම ද මෙවර නෙළුම් මල් පූජාවේ විශේෂත්වයකි.

මෙයට පෙර වසරවලදී එම නෙළුම් මල් පූජාව ශ්‍රී දළදා මාලිගාව, කැලණි රාජ මහා විහාරය, ජය ශ්‍රී මහා බෝධීන් වහන්සේ, රුවන්වැලි මහ සෑය, ථූපාරාමය, මිරිසවැටිය, මහියංගනය, මුතියංගනය, සේරුවාවිල, කතරගම ආදී පූජනීය ස්ථානවලදී සිදු කැරුණු බවද අතුල නාහිමියෝ පැවැසූහ.

වාර්ෂික නෙළුම් මල් පූජාවෙන් අනතුරුව ජූලි 25 වන දා රාත්‍රී කතරගම පුද බිමේ දී සර්ව රාත්‍රික පරිත්‍රාණ ධර්ම දේශනාවක් ද පසුදා උදෑසන කිරි ආහාර පූජාව ද දවල් සපිරිකර සංඝගත දක්‍ෂිණාවද පිරිනැමේ.