කෝට්ටේ පෙරහර

දිනිත් දසුන් හපුතන්ත්‍රී

කෝට්ටේ රජමහා විහාරය ඓතිහාසික වශයෙන් මෙන්ම සංස්කෘතික වශයෙන්ද වැදගත්වේ. ඓතිහාසික ස්භාවය ගත් කළ එහි පුරාණ කථාව සය වන පැරකුම් රජ සමය දක්වා විහිදී යයි. එසේම එහි පළමු වන විහාරාධිපති පදවිය ලද්දේ පිලානේ නායක ස්වාමින් වහන්සේය.

කෝට්ටේ රජමහා විහාරස්ථානයේ බෝධීන් වහන්සේට අමතරව නාබෝධිය යනුවෙන් බෝධියක් ඇත. එකල සිටි සපුමල් කුමාරයා මුල්ලේරියා සටන පෘතුගීසින්ට අත්පත් කර දී කෝට්ටේට පැමිණ කඩුව තබා ඇත්තේ මෙම නා බෝධිය අසලයි. එම ස්ථානයේ නා බෝධිය සේම සපුමල් කුමාරයා වෙනුවෙන් දේවාලයක් සාදා තිබේ. මෙයට ගරු බුහුමන් කිරීමට මෙම විහාරයට පැමිණෙන බැතිමතුන් අමතක කරන්නේ නැත.

විහාරයට පැමිණියොත් මෙම නා බෝධිය ද වැඳ පුදා ගනී.

එසේම මෙහි තව දේවාල දහහතරක් දැක ගැනීමට හැකිය. තව ද මෙම විහාරයට ලංකා සහ හේමන්ත යනුවෙන් අලි දෙදෙනකු ද වේ.

එසේම මෙම විහාරස්ථානයේද දන්ත ධාතුන් වහන්සේ තැන්පත් කර තිබූ බැවින් දළදා පෙරහරක් වාර්ෂිකව මෙම විහාරයේ පැවැත්වේ’ වර්තමාන විහාරාධිපති අලුත් නුවර අනුරුද්ධ ස්වාමීන් වහන්සේ පැවසුවේ මෙවර එකසිය අට වන වතාවට මෙම දළදා පෙරහර පවත් වන බවයි.

මෙම දළදා පෙරහරේ කප් සිටුවීම අගෝස්තු (27) වන දින සිදුකර සැප්තැම්බර් (06) වන දින වීදි සංචාරය කෙරේ.

එසේම අනුරුද්ධ ස්වාමින් වහන්සේ පැවසුවේ මෙම පෙරහර නැරැඹීමට පැමිණෙන සියලු බැතිමතුන් සුදු වස්ත්‍රයෙන් සැරසී පැමිණ දළදා වහන්සේට ගෞරව කරන ලෙසය.