වස්සාන කාලයයි මේ

ලස්සන මලින් සැරසුන තුරු වදුළු යට
තිස් තුන් පැයේ සදහම් හඬ ඇසෙන විට
හිස් උන බණමඩුවේ උවැසියො පිරෙන කොට
වස් කාලය ඇවිත් බොදු මග අලුත් කොට

වැසි සළු අරන් ගම්මානයෙ ගෙයින් ගෙට
විසිරෙයි සාධු නාදය පැන් පිරිත් කොට
ඉසිකෝ මද මාන සිතිවිලි ඈත් කොට
පිවිසෙයි කඨින පෙරහර ගම් තුලානට

අට මහ කුසලයකි වසරට වරක් එන
වස් තුන් මාසයෙහි දන් වැට අලුත් උන
සැරසී සුදු වතින් තෙල් මල් අතින් ගෙන
යමු පන්සලට අපි බැති සිත් පුරෝ ගෙන

ගිලීමලේ
සමීර එම්. ගමගේ

****

තුන් කල් දැක්ම

හිමි නැති
ඕනෑකම ඇති
පස් කඳක් ඇද
බදා ගන්නට
සසර ගණනක් තිස්සේ
මහා සටනක්
ජයෙන් සතුටත්
පැරැදුමෙන් දුකත්
උරුම බව දැන දැනත්
සටනෙ ජය වීය
අහිමි ව එක අතක්
බඩක බත් පුරවන්න
යුද පෙරමුණට ගොස්
මැව්වත් අනාගත සිහින
දෙ අත් මල් දමක මැදි වී
ගියා පස් කඳ පැදුරටත් නො කියා
නැති වූ අතේ අත්තම
තුන්කල් දැක්ම ගෙව්වා

කුලුණු හේරත්

****

හිරු සඳු අසිරිය

අරුනලු සමඟින් පිබිදෙනවා
සඳ නැඟ එන විට සැතපෙනවා
හිරු සඳු තරගෙට හිනැහෙනවා
ලෝ දම මෙලෙසින් කැරකෙනවා

බිළිඳකු විලසින් ඉපදෙනවා
නොදැනිම වයසත් ගතවෙනවා
අඹු දරු රකිමින් වෙහෙසෙනවා
නව මං සොයමින් යනවා

නොසිතූ දේවල් සිදුවෙනවා
සඳු හිරු යට අප ළතවෙනවා
හිරු සඳු නොනැසී බැබළෙනවා
ඉපදෙන සැම සත මියැදෙනවා

ආචාර්ය
රත්නපාල වික්‍රමසිංහ

****

වදනක්

වචනය වැරැදි ලෙස අන් හට කියන විට
පිරිසක් තමන් ඇසුරෙන් යනවා එපිට
නැති වුණ පිරිස තම සහයට නොමැති විට
දුකමයි ඉතිරි වන්නේ තම දිවි මඟට

දෙවරක් සිතා වදනක් පැවසීම යුතු
කීම ද ඇසීම ද කේළම් නොකට යුතු
පළමු ව තමන් ගැන පමණක් සිතිය යුතු
පරහිතකාමී දිවි මඟ අනුකරණ යුතු

මහීපාල ඒ. සිරිසේන, අලව්ව

****

අමා දහම

සිලි සිලි නාදෙං
බෝ පත් සෙළවෙයි
මද සුළඟක් ඇවිදින්
අව්වේ ඇති රැස් මාලා
සමහන් කර දෙයි
බෝ පත් අතරට
කිට්ටු වී බලන විට ද
සිත සැනසී යයි
බෝ පත් මේ සෙළවෙන්නේ
අමා බණකි පවසන්නේ

කෝට්ටපිටියේ පඤ්ඤාසිරි හිමි
දම්සෝපුර