පුතුනි බලන් ඒ පියතුම එන්නේ
මහා පුරුෂ ලකුණින් සැරසීලා
ශාක්‍ය කුලේ බිහි වී මඟ පාලා
ගිහිගෙය හැරගිය ලොව ගැන හිතලා
පුතුනි පියා එයි මඟ සරසාලා
ගමනින් ඇත් රජු හට සම වන්නේ
දෙවි මිනිසුන් හට පි‍්‍රය බව දන්නේ
පුන්සඳ මඬලින් වත බබළන්නේ
පියතුම නුඹගේ පුතුනි වඩින්නේ
සීල සමාධි ගුණ ගඟ උතුරා
කැත්කුල බිහි වී දෙව්බඹ සපුරා
දෙව් මිනිසුන් නිති පායුග මතුරා
පුතුනි නුඹේ පිය වෙයි මහ ඇදුරා
අඳුන් නීල කෙස් හිස සරසන්නේ
රන්පට නළලට උපමා වන්නේ
ඌර්ණ රෝම ධාතුව හිමි වන්නේ
එවැනි පියෙකි පුත නුඹට සිටින්නේ
තරු කැළ පිරිවැර පුර සඳ වැන්නේ
මහ සඟ ගණ මැද රුවට වඩින්නේ
හිකත සනහා මහමඟ එන්නේ
ඒ නරසිහ පියතුමයි වඩින්නේ
දඩල්ල වාලුකාරාම වෙහෙරවාසි, ශාස්ත්‍රපති
රත්ගම සුනීත හිමි |
