හැම මොහොතකම පින් කරන්න

රාජකීය පණ්ඩිත, ශාස්ත්‍රපති
කොටනෙළුවේ පුඤ්ඤානන්ද හිමි

ලංකාවේ මෙන් ම ලෝකයේ බොහෝ බෞද්ධ විහාරස්ථාන ඇසුරු කරමින් පසුගිය මාසය පුරාවට කඨින පින්කම් පැවැත්විණි. බොහෝ පිරිසක් එම කඨින පින්කම්වලට සමගාමී ව ධර්ම දේශනා, බෝධි පූජා, අටවිසි පූජා, පිරිත් දේශනා වැනි බොහෝ පින්කම් සංවිධානය කරමින් කුසල් දහම් රැස්කර ගත්හ.

වස් තුන් මාසයේ මෙන් ම චීවර මාසයේ තවත් පිරිසක් භික්ෂූන් වහන්සේට සිවුපසයෙන් උපස්ථාන කරමින් කටයුතු කළහ. තවත් පිරිසක් සිල් සමාදන් වී ප්‍රතිපත්ති ගරුක ව ජීවිතය ගෙවීමට උත්සාහ ගත්හ. තවත් පිරිසක් ඒ මහා පින්කම් බලා සතුටු සිතින් පින් අනුමෝදන් වූහ. තවත් පිරිසක් පින්කම් දැක ගරහමින් මුහුණු පොතේ මෙන් ම තැන්තැන්වල විවේචනය කරමින් පව් සිදු කර ගත්හ.

අදින් මෙවර කඨිනය හමාර වෙනු ඇත. එහෙත් ඔබ පින්කම් හමාර කරන්න නොසිතන්න.

මෙම පසුගිය සිව් මාසය පුරාවට යම් ප්‍රතිපත්ති පූජාවක හෝ ආමිෂ පූජාවක නිරත වී සිටියේ නම් එය ඉදිරියටත් කරගෙන යෑමට අදිෂ්ඨාන කර ගන්න.

මේ බුද්ධ ශාසනය තුළ වැඩිපුරම සෝවන්, සකදාගාමී, අනාගාමී, අරහත් යන සතර මග, සතර ඵලයන්ට පත්වී ඇත්තේ වස්කාලය තුළයි. ඔබට වස්කාලය තුළ ජීවිතයේ සිල්වත්කමින් හෝ ගුණවත්කමින් කිසියම් හෝ වෙනසක් වීමට හැකියාවක් නොලැබුණේ නම් ඉදිරියට හෝ යම් තරමකින් හෝ වෙනස් වීමට සිතට ගන්න.

කඨිනය හමාර වුවත් පින්කම් හමාර නොකිරීමට වගබලා ගන්න.