පහන් සිතක කවි
නවම් පෝදා
කෝලිත උපතිස්ස හොඳ මිතුරන් වූවා
සැරියුත් මුගලන් නාමෙන් අගසව් තනතුරු ලැබුවා
නවම් පෝය එනිසා වැදගත් වෙනවා
පුන් සඳ සමඟ පුන් පෝයක් උදා වුණා
බී.ඩබ්ලිව්.චන්ද්‍රාවතී.
සුමනතිස්ස දහම් පාසල
පොද්දෙනිය
උරුමය
තමා කළ කී දෙය
තමාගේ පිහිට කරගෙන
උරුමයේ තබා
ඒ පමණක් ගෙන
ඔහු මියගොස් තිබේ
ගෙවූ දිවියේ
ශේෂ විත්ති
පාංශුකූලයේ ද
චරිතාපදානයක සේ
ප්‍රදානය කොට දී තිබිණ
උපත හා විපත
සොහොන් කොතෙහි
අලංකාර අකුරිනි
සොහොන් කොත
සෑදු පිරිසගේ
මානය හා වෙනත් දෑ ද
දකින්නට නොලැබේ
හෘදය සාක්ෂිය
පින් මහිමය
පිනට ලද උද්දාමය
වෙනත් බොහෝ දෙය
කොහේදීවත් අහන්නවත්
දකින්නවත් නොතිබිණ
ශාස්ත්‍රවේදී
කෝට්ටේපිටියේ පඤ්ඤාසිරි හිමි
අශෝකාරාමය
නිවැරැදි සුව
සම්බුදු හිමි දෙසූ පන්සිල් නිති රකිමු
මෙත් සිත් පෙරටුකර ලොව තුළ දිවි ගෙවමු
අටලෝ දහම අරි අට මඟ පිළිපදිමු
කෙටි ජීවිත ගමනෙ නිවැරැදි සුව ලබමු
මාලබේ
කේ.ඩබ්ලිව්. සිරිසේන
සසරක හැටි
බැඳෙනවා සසරෙ අප සිත ඇඳුන වස්තුවල
රැඳෙනවා බැඳීමෙන් එහි මෙහෙයෙ ක්‍රියාවල
දැවෙනවා රැඳීමෙන් සිත් සතන් වැනසිල්ල
තැවෙනවා දැවීමෙන් සිත සසරෙ කැලෑවල
කිතුල්ගල
රත්නසේකර රූපසිංහ
දැන සමරමු
වේළුවනය බුදු මහ සඟරුවන හට
පූජා කරයි බිම්සර රජු මනා කොට
පොහොදින වරුණ දැන සදහම් පසක් කොට
කුසල් වඩමු අප සසරින් මිදෙන්නට
ඩී.ජී.පී. ජයන්ති
ශ්‍රී සුමනසාර දහම් පාසල
පයාගල
නොබැඳෙමු
පලක් නැත බැඳී
මේ ලොවට
මියෙනතුරු
ගැටලු
සෙවු විසඳුම් ලැබූ
සහන නැත සිතට
මියැදී නැවතත් එයි
මේ කුණු ලොවට
යයි භවයේ දිගට
එකක් විසඳා ගත නොහැකි
ඔබට
නොසිතිය හැකි
නොමිණිය හැකි
ප්‍රමාණයකි විසඳුමට
නොගැටෙනු
නොබැඳෙනු
මේ ලොවට
එස්.එල්.ඩී. ආර්. සමරතුංග |
