පිම්මක්
අනුන්ගෙ වැරැදි සොය සොය යන සංසාරේ
පිනකට ලැබුන මිනිසත් බව මේ වාරේ
දුර්ලභ උපත ගෙන නැවතත් පෙර සසරේ
කළ කී දෙය ද කරමින් ඉන්නේ සොයුරේ
තමන්ගෙ කුඹුරෙ වල් පැල නොගලවා ඉඳන්
අනුන්ගෙ කුඹුරෙ වල් පැල ගලවනව සැනින්
කුඹුරේ අඩු පාඩු නොපෙනෙන ගොවියාගෙන්
වල් අස්වනු පමණි ගත හැකි සිය කුඹුරෙන්
තමාගෙ පිහිට තමහට ම යි සැමදාම
අනුන්ගෙ පිහිට ගෙන හිටියොත් වැනසීම
දහමේ පිහිට ගෙන සිටියොත් සැනසීම
ලැබෙන බවයි බුදු හිමියන්ගේ දෙසුම
කලණ මිතුරු සෙවණින් ඕවාද ගෙන
යා යුතු අරිය මග පිරිසිඳව දැනගෙන
මරු ඉඟිකරන්නට පෙර දුක හඳුනගෙන
පිම්මක් ගසමු මෙතරින් එතරට යැවෙන
දෙහිඅත්තකණ්ඩිය
කජුවත්ත සේනාසනයේ
බිබිලේ ධම්මසිරි හිමි |
